पाकिस्तानमा विद्यालय भवन भत्किँदा ३५ को मृत्यु, ४० भन्दा बढी घाइते

काठमाडौँ,२९असोज।  पाकिस्तानको पेशावरमा बिहीबार एउटा निजी स्कुलको छाना खस्दा मृत्यु हुनेको सङ्ख्या ३५ पुगेको छ।

मृतकमध्ये ३४ जना विद्यार्थी र एक जना महिला शिक्षक रहेका छन्। सबै बालबालिका १३ वर्ष वा सोभन्दा कम उमेरका हुन्।

यो दुर्घटना दीर कोलोनिए क्षेत्रमा भएको हो। यस घटनामा ४० भन्दा बढी मानिस घाइते भएका छन्। उनीहरूको उपचारका लागि अस्पतालमा आपतकाल घोषणा गरिएको छ। अस्पतालको ट्रमा वार्डमा डाक्टर र अन्य स्वास्थ्यकर्मीहरूलाई तैनाथ गरिएको छ।

दुर्घटनालगत्तै स्कुल परिसरमा मानिसहरूको भिड जम्मा भएको थियो। मलबेमा अझै केही मानिसहरू च्यापिएको आशङ्कामा खोजी तथा उद्धार कार्य जारी छ।