कांग्रेसको दाबी: गगन थापाको घरअगाडि प्रहरीकै सहयोगमा शंकास्पद गाडी राखियो

 काठमाडौं, ३० असार। नेपाली कांग्रेसले प्रहरी प्रशासनकै सहयोगमा पार्टीका सभापति गगन थापाको घर अगाडि शंकास्पद गाडी पार्किङ भएको दाबी गरेको छ ।

प्रतिनिधिसभाको बैठक सुरु भए लगत्तै विपक्षी दलहरूले उठेर विरोध गरे । सभामुख डोलप्रसाद अर्ष्यालले समय दिएपछि पार्टीका तर्फबाट बोल्दै कांग्रेसका सचेतक निश्कल राईले यस्तो दाबी गरेका हुन् ।

‘सरकार १८२ सिटको प्रचण्ड बहुमतको सरकारमाथि किन प्रश्न गरिस् भन्दै सभापतिज्यूको घर अगाडि लगेर पार्क गर्छ । त्यो पनि प्रहरी प्रशासनकै सहयोगमा,’ उनले भने, ‘शंकास्पद लागेपछि समुदायले शान्ति सुरक्षा खोज्छ । बिडम्बना प्रहरी मुकदर्शक बन्छ र दिनभर गाडी पार्कमै छाड्छन् ।’ यसलाई उनले राज्य आतंक भनेका छन् ।

‘बाटो जाम गर्छ, आतंक सिर्जन गर्छ । समुदायले गाडीको मालिक चाहियो भनेपछि हतारमा प्रहरीले हामी मिलाउँछौं भन्दै गाडी लिएर जान्छ,’ उनले भने ।

साथै उनले मिडिया हाउस अगाडि गाडी पार्किङको विषय पनि उठाए ।

‘सोमबारको घटना सभापतिज्यूको घरमा मात्रै भएको होइन । कान्तिपुर, अनलाइनखबरजस्त प्रपतिष्ठित सञ्चारमाध्यम अगाडि पनि त्यस्तै गाडी छाडेर हिडिन्छ । त्यो पनि सत्तारुढ दलकै नेताको गाडी,’ उनले भने ।

अनलाइनखबर, हिमालय टीभी र कान्तिपुर मिडिया हाउसका कार्यालयअघि सोमबार बिहान शंकास्पद रुपमा गाडी पार्किङ गरिएको थियो । गाडीहरू कार्यालय प्रवेशमा अवरोध गर्ने गरी पार्किङ गरिएको थियो ।

एकै समयमा उस्तै तरिकाले पार्किङ गरिएको थियो । शंकास्पद तरिकाले पार्किङ गरिएपछि मिडिया हाउसहरूले प्रहरीलाई खबर गरेका थिए । त्यसपछि तीनवटै मिडिया हाउसमा प्रहरी आएर गाडीधनीको सोधखोज गरेका थिए । कसले यस्तो गर्‍यो भन्ने अहिलेसम्म प्रहरीले ठोस रुपमा पत्ता लगाएको छैन ।

मिडियाहरूको आवतजावतमा अवरोध गर्ने गरी शंकास्पद रूपमा पार्किङ गरिएको घटनाबारे संसद्मा प्रश्न उठेको हो ।