जुवाखालमा प्रहरीको छापा, सईसहित १६ जना पक्राउ

काठमाडौं, २६ साउन। जुवा खेल्दै गरेको अवस्थामा प्रहरीले १६ जनालाई पक्राउ गरेको छ । प्रहरी वृत्त दरबारमार्गको टोलीले लैनचौरस्थित गाउँबेशी थकाली भान्छाघरबाट मंगलबार बिहान १६ जनालाई पक्राउ गरेको हो ।

पक्राउ पर्नेहरूमा नेपाल प्रहरीका सई सरोज गिरी समेत छन् । उनीसँगै काभ्रेका रेशम बहादुर घ्यावा, दोलखाकी हेमा गुरुङ, चितवनकी शान्ता लामा, काभ्रेका नवराज नेपाल, सिन्धुपाल्चोकका अमर तामाङ, नुवाकोटका रमन लामा, नुवाकोटकै नवीनकुमार लामा, सन्तोष डंगोल छन् ।

त्यसैगरी झापाका टिकाराम बराल, ललितपुरका उमेश चौधरी, नुवाकोटका मंगलबहादुर तामाङ, चिबहादुर लामा, सिन्धुपाल्चोकका सुमन गरी, यस बहाहदुर तामाङ र  नुवाकोटका सुजन तामाङ छन् ।

उनीहरू मध्ये सुजन तामाङ गाउँबेशी थकालीका सञ्चालक हुन् । उनीहरूबाट १३ लाख १७ हजार १२५ रुपैयाँ बरामद भएको छ । पक्राउ परेकाहरूविरुद्ध प्रहरी वृत्त दरबारमार्गले अनुसन्धान अघि बढाएको छ ।