पर्सागढीबाट अवैध सालको काठ बरामद, दुई तस्कर पक्राउ

वीरगञ्ज,२९ असार। पर्सा जिल्लाको पर्सागढी नगरपालिका क्षेत्रबाट सालको अवैध काठ तस्करीमा संलग्न दुई जना तस्करलाई बन गस्ती टोलीले पक्राउ गरेको छ ।

शनिवार राति करिब १२ बजे सबैयास्थित साझेदारी वन क्षेत्रबाट सालको गोलिया साइकलमा बोकेर रतनपुरतर्फ लैजाँदै गरेका दुई जनालाई पर्सागढी–४ स्थित भेडाहा टोल नजिकैबाट नियन्त्रणमा लिइएको हो । गस्ती टोली सब डिभिजन वन कार्यालय सबैयाका रेन्जर भूपाल रोकायको नेतृत्वमा खटिएको थियो ।

पक्राउ पर्नेमा पर्सागढी–४ पसरामपुरका अब्दुला देवान र वीरगञ्ज महानगरपालिका–३१ मिलनचोकका जोखुवा रहेका छन् । दुवै जना काठ तस्करीमा संलग्न ‘नामुद तस्कर’ रहेको र उनीहरूसँगै रहेका अन्य दुई जना भने गस्ती टोली देखेपछि फरार भएको रेन्जर रोकायले जानकारी दिए ।

उनीहरूको साथबाट ४ थान सालको गोलिया र तस्करीमा प्रयोग गरिएको साइकल समेत बरामद गरिएको छ । पक्राउ परेका दुवै जनामाथि आवश्यक कारबाहीका लागि डिभिजन वन कार्यालय वीरगञ्जमा बुझाइएको छ भने फरार तस्करहरूको खोजी कार्य तीव्र रूपमा जारी रहेको बताइएको छ ।