पाल्पामा खोलाले बगाउँदा दुई युवकको मृत्यु

पाल्पा, १८ भदौ। पाल्पामा खोलाले बगाएर दुई युवाको मृत्यु भएको छ ।

पाल्पाको रैनादेवी छहरा गाउँपालिका–७ जोगदमारका दुई युवक खोलाले बगाउँदा मृत अवस्थामा भेटिएका हुन् । मृत्यु हुनेमा ३२ वर्षीय विपिन पोख्रेल र २३ वर्षीय प्रविन पुन रहेको प्रहरीले जनाएको छ ।

गत भदौ १५ गते बेलुकी करिब ६ बजे लु २१ प ९८७६ नम्बरको मोटरसाइकलमा सत्यवतीतर्फ गएका उनीहरू घर नफर्किएपछि परिवारले भदौ १७ गते बिहान अस्थायी प्रहरी पोष्ट बेलबासमा खबर गरेका थिए ।

प्रहरीले खोजतलास गर्दा डुम्रेवासस्थित सडकबाट करिब ५ फिट तल ठाडोखोलामा उनीहरू चढेको मोटरसाइकल भेटिएको थियो ।

दुवै जनाको शव रुपन्देहीको सैनामैना–१० मौवाधारीस्थित कञ्चन खोलामा बगाएको अवस्थामा प्रहरीले फेला पारेको हो ।

जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक भिमलाल भट्टराईका अनुसार, दुवै शवलाई पोष्टमार्टमका लागि लुम्बिनी प्रादेशिक अस्पताल बुटवल पठाइएको छ ।

घटनाबारे थप अनुसन्धान भइरहेको प्रहरीले जनाएको छ ।