बागलुङ बसपार्कमा ग्याङ फाइट, युवतीसहित ६ जना पक्राउ

पोखरा, २७ वैशाख। पोखराको बागलुङ बसपार्कमा गत वैशाख २२ गते राति भएको ग्याङ फाइटमा संलग्न ६ जनालाई प्रहरीले पक्राउ गरेको छ।

सामाजिक सञ्जालमा उक्त झै-झगडाको भिडियो सार्वजनिक भएपछि जिल्ला प्रहरी कार्यालय कास्की र वडा प्रहरी कार्यालय बगरको टोलीले अनुसन्धान सुरु गरेको थियो।

प्रहरीले खोजतलासका क्रममा वैशाख २६ गते पोखराका विभिन्न स्थानबाट एक महिलासहित ६ जनालाई नियन्त्रणमा लिएको हो। पक्राउ पर्नेहरूमा पोखरा-१३ बाझपाटन बस्ने २७ वर्षीय सुजन आले मगर, २३ वर्षीय राजेश परियार र गोरखा घर भई सोही ठाउँ बस्ने ३० वर्षीय ‘दिपेश’ भनिने दिलेराम गुरुङ रहेका छन्। यस्तै, बागलुङ बसपार्क क्षेत्रमा बस्ने १८ वर्षीय सुजन तामाङ, २५ वर्षीय राजकुमार तामाङ र २० वर्षीया लिजा पुनलाई पनि प्रहरीले नियन्त्रणमा लिएको छ।