सरल सहयात्री बागमतीको आर्थिक मामिला मन्त्री बन्दै

काठमाडौं, ०४ भदौ। बागमती प्रदेशको आज गठन हुने सरकारमा नेकपाका नेता सरल सहयात्री पौडेल आर्थिक मामिला तथा योजना मन्त्री बन्ने भएका छन् ।

सत्ता साझेदार दल नेकपा एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा) बीच प्रदेश सरकारमा मन्त्रालय बाँडफाँटको सहमतिअनुसार सहयात्रीलाई आर्थिक मामिला तथा योजना मन्त्रालयको जिम्मेवारी दिने तयारी गरिएको हो ।

नेकपाबाट मन्त्री बन्नेमा सिन्धुपाल्चाेकका तत्कालीन नेकपा माओवादी पृष्ठभूमिका सरल सहयात्रीकाे नाम टुंगिएकाे नेकपाका नेता तथा पूर्वमन्त्री रत्नप्रसाद ढकालले जानकारी दिए ।

उनकाअनुसार भागबण्डाअनुसार नेकपाले पाउने अर्काे एक मन्त्रालयमा कसलाई पठाउने भन्नेबारे औपचारिक रूपमा टुंगाे लाग्न बाँकी छ ।

नेकपाले अर्का मन्त्रीमा माधव नेपाल पक्षकी रमा आले मगरलाई पठाउने चर्चा पनि छ । उनी यसअघि युवा तथा खेलकुद मन्त्री भइसकेकी छन् ।

भागबण्डाअनुसार नेकपाले करिब एक वर्षदेखि रिक्त सभामुखसहित २ मन्त्रालय पाएकाे छ ।

सभामुखकाे पनि टुंगाे लगाइनसकेकाे नेकपाभित्र काभ्रेका रत्नप्रसाद ढकालकाे चर्चा छ । यद्यपि, उनले आफू सभामुख बन्ने टुंगाे लागिनसकेकाे र छलफल भइरहेकाे अनलाइनखबरलाई बताए ।

यसअघि राप्रपाबाट सभामुख बनेका भुवनकुमार पाठकले गत भदाैमा जेनजी आन्दाेलनकाे क्रममा सभामुख पदबाट राजीनामा दिएका थिए । त्यस यता सभामुख पद रिक्त छ ।

उपसभामुख अप्सरा चापागाईंले प्रदेशसभा सञ्चालन गर्दै आएकी छन् । उपसभामुखमा चापागाईंले नै निरन्तरता पाउने भएकी छन् ।

यसैगरी एमाले, नेकपा र राप्रपाबीच बुधबार टुंगिएकाे मन्त्रालय भागबण्डामा पनि हेरफेर गर्नुपर्ने विषय दलभित्र उठिरहेकाे छ ।

नेकपाले दाबी गरिरहेकाे खानेपानी, ऊर्जा तथा सिँचाइ मन्त्रालयमा राप्रपाले पनि दाबी गरेकाे छ । नेकपा सांसद ढकालका अनुसार खानेपानी मन्त्रालय वा उद्योग, पर्यटन मन्त्रालयमध्ये एउटा नेकपाले पाउनुपर्ने दाबी गरिएकाे हाे ।

एमाले सांसद तथा प्रदेश सभाकाे उद्योग पर्यटन तथा वातावरण समिति सभापति आनन्दकुमार श्रेष्ठका अनुसार यसअघि एमालेले मुख्यमन्त्रीसहित २ वटा मन्त्रालय, नेकपाले सभामुखसहित २ वटा मन्त्रालय र राप्रपाले ३ वटा मन्त्रालय लिने सहमति भएकाे थियाे ।

एमालेले मुख्यमन्त्रीसहित भौतिक पूर्वाधार तथा विकास मन्त्रालय र आन्तरिक मामिला, कानुन तथा सहकारी मन्त्रालय लिने भएकाे छ ।

नेकपाले आर्थिक मामिला तथा योजना र खानेपानी ऊर्जा तथा सिँचाइ मन्त्रालय पाउने सहमति थियाे ।

राप्रपाले स्वास्थ्य तथा सामाजिक विकास मन्त्रालय, कृषि, पशुपन्छी, वन तथा वातावरण मन्त्रालय र उद्योग, पर्यटन, श्रम तथा यातायात मन्त्रालय पाउने सहमति भएको सांसद श्रेष्ठले जानकारी दिए ।

बुधबार एमाले, नेकपा र राप्रपा बीच नयाँ सरकार गठनकाे लागि ६३ जना बहुमत सांसदकाे समर्थनसहित एमालेका किरण थापा मगरलाई मुख्यमन्त्री बनाउन प्रदेश प्रमुख दीपकप्रसाद देवकाेटा समक्ष दाबी पेस भएकाे छ ।

राप्रपा बागमती प्रदेश संसदीय दलले गरेकाे समर्थनलाई पार्टीकाे केन्द्रले अनधिकृत भन्दै मान्यता नदिन प्रदेश प्रमुखलाई बुधबार नै पत्राचार गरिसकेकाे छ ।

एमाले र नेकपाका नेताहरूले राप्रपा पार्टीभित्रकाे आन्तरिक विवादले सरकार गठनमा समस्या नहुने दाबी गर्दै आएकाे छन् । जसअनुसार आज बिहीबार ४ बजेपछि मुख्यमन्त्री थापासहित मन्त्रीहरूकाे नियुक्त र शपथकाे तयारी गरिएकाे छ ।