वर्तमानकाल सम्वाददाता
पर्साको पटेर्वा सुगौली गाउँपालिका – २ थरकट्टीमा बाघको आक्रमणबाट एक युवकको मृत्यु भएको छ ।मृत्यु हुनेमा थरकट्टी गाउँका बाबुलाल महतो उराँवका छोरा २० वर्षिय मनोज महतो उराँव रहेका छन् ।
सब डिभिजन वन कार्यालय रङ्गपुरका रेञ्जर कपिलदेव यादवका अनुसार जङ्गलसँग जोडिएको थरकट्टी गाउँका मनोज आइतबार बेलुकी शौच गर्न खेत तिर गएका थिए । राति अबेरसम्म घर नफर्किएका मनोजलाई खोज्न छिमेकी र गाउँलेहरूले सोमबार बिहान खेत तिर जाँदा खेत नजिकैको जङ्गलमा बाघले मारेर खाएको अवस्थामा मनोजका शरीरका अङ्गहरू भेटिएको रेञ्जर यादवले जानकारी दिए ।
पर्साका प्रहरी प्रवक्ता एवम् प्रहरी नायब उपरीक्षक (डिएसपी) कुमार विक्रम थापाले थरकट्टी गाउँमा बाघले मान्छे मारेको खबर प्रहरीलाई आएपछि अनुसन्धानका लागि प्रहरीको टोली घटनास्थलमा पुगेका थिए । उक्त ठाउँमा यस्ता घटना सधै घटदा त्यहाँ स्थानिय त्रसित बनेका छन ।
