// बिमलेश कुमार झा //
रौतहट,०५ भदौ। रौतहटको मौलापुर नगरपालिका वडा नम्बर ६ स्थित श्री माध्यमिक विद्यालय पथरा बुधराममा हुन लागेको विद्यालय व्यवस्थापन समितिको सदस्य पदको उम्मेदवार भुपेन्द्र जैसवालले विद्यालयमा भइरहेको अन्याय र अत्याचारलाई हटाउन मेरो उम्मेदवारी रहेको बताएका छन्।
बुधबार आफ्नो निवासमा पत्रकारसँग कुराकानी गर्दै आसन्न भदौ ७ गते शुक्रबारका दिन हुन लागेको व्यवस्थापन समितिका सदस्य पदका लागि उम्मेदवारी दिएका जैसवालले विगत देखि विद्यालयमा भइरहेको चरम राजनीतिकलाई हटाउन,कक्षा १ देखि ५ सम्मको पठनपाठन अङ्ग्रेजी माध्यम बनाउन, लथालिङ्ग अवस्थामा रहेको ऐतिहासिक महाकार पोखरालाई सौन्दर्यकरणा गर्न,आर्थिक पारदर्शिता गर्न र शैक्षिक गुणस्तरलाई ग्यारेन्टी गर्न म लगायत मेरो प्यानलको उम्मेदवारी रहेको बताएका छन्।
सामाजिक क्षेत्रमा क्रियाशील रहेका जैसवाल सो विद्यालयका पूर्व विद्यार्थी पनि हुन्। उनका अनुसार विकासको प्रमुख औजार शिक्षा हो । औपचारिक शिक्षा प्राप्त गर्ने थलो विद्यालय हो । विद्यालय विद्यार्थीले पढ्ने र शिक्षकले पढाउने वैधानिक संस्था हो । यो शान्तिक्षेत्र हुनु पर्छ भन्ने एक विश्वव्यापी मान्यता हो । तर यहाँ विद्यालय राजनीति क्षेत्रको रूपमा प्रयोग भएको देखिन्छ ।
उनले आफू लगायत हाम्रो सम्पूर्ण प्यानल रिकेश्वर यादव,सिमा देवी,सीता कुमारी देवीलाई पंखा छापमा मतदान गरि आफ्नो छोराछोरीको भविष्यलाई अन्धकारबाट जोगाउन सम्पूर्ण अभिभावकसँग आग्रह गरेका छन्।
