रौतहटबाट गाई, गोरु भारत लैजान लागेको आरोपमा तीनजना पक्राउ

वर्तमानकाल सम्वाददाता
असोज ०४, रौतहट
अवैध रुपमा भारततिर गाई, गोरु लैजान लागेको आरोपमा रौतहट प्रहरीले शुक्रबार तीन जनालाई पक्राउ गरेको छ । उनीहरुलाई पशुसहित प्रहरीले पक्राउ गरेको हो भने पशुधनी फरार भएका छन् । जिल्लाको ईशनाथ नगरपालिका–१ स्थित लालबकैया नदीको बाँधबाट प्रहरीको गस्ती टोलीले यमुनाईमाई–३ मलहिना बस्ने महम्मद गुफरान, ओहिद अन्सारी र मोहम्मद सम्सादलाई गाई, गोरु र बाछोसहित पक्राउ गरेको जिल्ला प्रहरीका डीएसपी एलिजा गिरीले जानकारी दिइन् ।

उनीहरुले अवैध रुपमा २ वटा गोरु, ४ वटा गाई र ३ वटा बाछो भारततर्फ लैजान लागेको अवस्थामा प्रहरीले लालबकैया नदीको बाँधबाट नियन्त्रणमा लिएको थियो । पक्राउ परेका तीनै जनालाई कारबाहीको लागि गौर भन्सार कार्यालय बुझाएको डीएसपी गिरीले बताइन् । ‘प्रहरीलाई देख्नासाथ पशुधनी फरार भए । उनको खोजी भइरहेको छ,’ डीएसपी गिरीले भनिन्,‘खुला सीमाको फाइदा उठाँउदै भारततिर गाई, गोरु लैजान नदिन कडा निगरानी गरेका छौं ।’