रौशन कुमार चौधरी
असोज १६, रौतहट
रौतहट जिल्लाको कटहरिया नगरपालिकामा नगर प्रमुख अजय प्रकाश जैसवालले बाढी पीडितहरुलाई राहत वितरण कार्यक्रमलाई निरन्तरता दिइरहनु भएको छ । गत तिन दिनअघि परेको अविरल वर्षाका कारण बाढीले धेरै मानिसहरूलाई घरविहीन बनाएको थियो, जसमा करिब ५०० घरपरिवार प्रत्यक्ष प्रभावित भएका छन् । यसप्रति संवेदनशील हुँदै, नगर प्रमुख जैसवाल आफैँ बाढी प्रभावित क्षेत्रहरूमा पुगेर पीडितहरूको अवस्था बुझ्न र राहत वितरण गर्न निरन्तर खटिरहेका छन् ।
बाढीका कारण धेरैको घरबार, पशुचौपाया, र खेतबारीमा लगाइएको धानबाली नष्ट भएको छ, जसले गर्दा स्थानीयहरू अत्यन्तै समस्यामा परेका छन्। यस कठिन परिस्थितिमा, नगर प्रमुख जैसवालले प्रत्यक्षरूपमा पीडित घरपरिवारको घरमै पुगेर उनीहरूको दुःख बुझ्ने र आवश्यक सहयोग गर्ने काम गरिरहनु भएको छ । बुधबारको दिन जैसवालले कटहरिया नगरपालिकाको वार्ड नं. १ भसेडवामा १६१ परिवार र वार्ड नं. ४ हर्षाहामा ३५० गरिब परिवारलाई राहत सामग्री वितरण गर्नुभएको छ । राहत सामग्रीमा प्रति परिवार खाद्ययान्न एक बोरा चामल, दाल, र त्रिपाल समावेश गरिएको थियो ।
यसअघि, नगर प्रमुखले सोही पालिकाको वार्ड नं. २ जमुनिया छेदी चौक टोलका ८१ परिवारलाई पनि राहत वितरण गरिसक्नु भएको थियो । जैसवालले आफ्नो उपस्थितिमा व्यक्तिको दुःख र समस्यालाई नजिकबाट बुझी आवश्यक सहायता गरिरहेकोले स्थानीय जनता उनको यो सहयोगात्मक कार्यप्रति निकै कृतज्ञ रहेका छन्। नगर प्रमुख जैसवालले बाढी प्रभावित गरिब परिवारहरूको घरमा पुगेर व्यक्तिगत रूपमा अवस्था बुझ्दै राहत प्रदान गरेपछि, स्थानीयहरूले उहाँलाई माया, स्नेह, र आशिर्वाद दिएका छन् ।
उहाँको यस निरन्तर सहयोगले गर्दा बाढी पीडितहरूमा केही राहतको अनुभूति भएको छ । जैसवालको यो मानवीय र सहयोगी भावनाको प्रशंसा स्थानीय बासिन्दाहरूले गर्दै आइरहेका छन् । कठिन परिस्थितिमा नगर प्रमुखले देखाएको सक्रियता र सहानुभूति अन्य समुदायहरूका लागि प्रेरणादायी बनेको छ । संकटको समयमा पनि जैसवालको यस्तो सक्रियता र जनताप्रतिको सेवा भावले उनलाई जनताको मनमा लोकप्रिय बनाएको छ ।
रौतहटको बाढी प्रभावित क्षेत्रमा अझै पनि धेरै मानिसहरूलाई राहत र पुनःस्थापनाको आवश्यकता रहेकाले, नगरपालिकाले थप राहत कार्यक्रमहरू सञ्चालन गर्ने योजना बनाएको छ। बाढी प्रभावित क्षेत्रको अवस्था नाजुक छ, र स्थानीय प्रशासन र अन्य संस्थाहरू पनि पीडितहरूको सहायताका लागि सक्रिय छन् । नगर प्रमुख जैसवालले भनेजस्तै, “यो समय सबैले एकसाथ मिलेर अगाडि बढ्ने हो, जसले गर्दा प्रभावित परिवारहरूले पुनः सामान्य जीवनतर्फ फर्कन सकून ्।“ उहाँको यो भावना र राहतकार्यले स्थानीय बासिन्दाहरूमा ठूलो राहत पु¥याएको छ र उनीहरूमा नयाँ आशा र विश्वास जागृत भएको छ ।
