रमेश कुमार यादब
असोज २६, रौतहट
राष्ट्रिय दलित पत्रकार संघ नेपाल, रौतहटद्वारा आयोजित शुभकामना आदानप्रदान तथा जेष्ठ नागरिक सम्मान कार्यक्रम शनिबार वृन्दावन नगरपालिका वडा नम्बर ८ बहुअरीमा सम्पन्न भएको छ । हिन्दू धर्मावलम्बीहरूको महान् पर्व विजया दशमी, शुभ दिपावली, तिहार तथा छठको पावन अवसरमा आयोजित उक्त कार्यक्रममा विभिन्न विशिष्ट अतिथिहरूको उपस्थिति रहेको थियो । लोकतन्त्रको मूल आधार,समान सहभागिता र विभेदमुक्त समाज,अभिव्यक्ती स्वतन्त्रता र मर्यादित पत्रकारिता हाम्रो आवाज भन्ने मूल नाराका साथ गठन भएको संघले पछिल्लो समय रौतहटमा आफनो सक्रियता बढाएको छ ।
कार्यक्रमको अध्यक्षता संघका जिल्ला अध्यक्ष राजेश पासवान निर्माणीले गरेका थिए भने प्रमुख अतिथिका रूपमा मुस्लिम इतिहाद संगठनका मधेश प्रदेश अध्यक्ष सलामोदिन दर्जी रहनु भएको थियो । कार्यक्रमको सञ्चालन वर्तमानकाल दैनिक पत्रिकाका सह–सम्पादक रमेश कुमार यादव र प्रदिप दासले गरेका थिए ।
राष्ट्रिय गानबाट सुरु भएको सो कार्यक्रममा विभिन्न काल खण्डमा ज्यान गुमाएका ज्ञात अज्ञात वीर सहिदहरुप्रति एक मिनटको लागि मौन धारणा गरिएको थियोे । विभिन्न समयमा बैठक देखि लिएर शुभकामना आदानप्रदान लगायताका कार्यक्रमहरु गर्दै आएको र समाजमा भइरहेको विभिन्न प्रकारका अन्याय,अत्याचार तथा भेदभाव प्रति संघले निरन्तर आवाज उठाइ रहेको कार्यसमितिले कामलाइ तिव्रता दिएको छ ।
सो कार्यक्रमलाई सम्बोधन गर्दै नेकपा एकिकृत समाजवादीका यूवा नेता एवम् कार्यक्रमका प्रमुख अतिथी समेत रहनु भएका दर्जीले पत्रकारहरुलाइ निडर, निर्भिक भएर कलम चलाउन आग्रह गरेका थिए । पत्रकारहरुलाइ आफनो कलम बन्द नगरी न्यायको साथमा लेख्न र अन्यायको खिलाफमा लेख्न अनुुरोध गरे । आफनो कर्तव्य निर्वाह गर्ने क्रममा विभिन्न बाधा अवरोधहरु आउन सक्छ । त्यसबाट एक इन्च पछाडी नहटन सुझाव दिएका छन् ।“यो संघले दलित समुदाय मात्र नभई सम्पूर्ण गरिब, पीडित र समाजका हरेक तप्काका मानिसहरूको आवाज उठाउन सफल भएको छ ।”
उनले थपे, “सत्य बोल्दा र लेख्दा विभिन्न चुनौतीहरू आउन सक्छन्, तर ती चुनौतीहरूलाई सामना गर्न हिम्मत जुटाउन जरुरी छ।”संघले लोकतन्त्रको मुल आधार, समान सहभागिता, विभेदमुक्त समाजको निर्माण, अभिव्यक्ति स्वतन्त्रता, र मर्यादित पत्रकारितालाई आफ्नो मुख्य उद्देश्यको रूपमा अगाडि सारेको छ । समारोहमा संघका अध्यक्ष राजेश पासवान निर्माणीले आफ्नो मन्तव्य राख्दै दलित समुदायका पत्रकारहरूलाई सत्य लेखनमा दृढ रहन आग्रह गरे । उनले भनें, “सत्य लेखन कहिल्यै पछि हट्ने कुरा होइन । पत्रकारिता भनेको समाजको ऐना हो, र यसले समाजमा भएका विकृतिहरूलाई उजागर गर्नु पर्दछ ।
” साथै, उनले दलित मात्र नभई गरिब, असहाय, तथा दिनदुःखीहरूको पक्षमा संघले आवाज उठाउँदै आएको बताए । वहाँले भने यो कार्यक्रम मात्र शुभकामना आदनप्रदान गर्ने उदेश्यले आयोजन गरिएको होइन् ? मूलरुपमा समाजमा कसरी परिवर्तन ल्याउन सकिन्छ ?त्यसमा आधारित रहेर कलम चलाउन र पत्रकारिता गर्न आग्रह गरेका छन् । दलितमाथि भइरहेको अन्याय,अत्याचार र विभेद लगायका विषयमा आफूले कलम चलाउँदै र अवाज उठाउँदै आएको स्मरण गराउँदै उपस्थित दलित पत्रकारहरुलाइ ति पिडितहरुको पक्षमा खम्बाको रुपमा खडा रहन आग्रह गरे ।
साथै उनले आफू मर्यादामा रहेर पत्रकारिता गर्न पनि सुझाव दिए । जथाभावी रुपमा सामाजिक संजालमा नलेख्न आग्रह गरे । आफू आठ वर्ष पत्रकारिता छोडेर पुनः पत्रकारिता क्षेत्र सक्रिय रुपमा काम गरिरहेको र यसैको देन हो कि आज मलाइ लाखौं मान्छेहरुले चिनिरहेका छन् । त्यसैले पत्रकारितामा पनि भविष्य छ ।यदि राम्रो सँग पत्रकारिता गर्नु भयो भने यसमा पनि धेरै अवसरहरु छन् । र ति अवसरहरु दिलाउन म भरपूर प्रयास गर्ने छु ।
कार्यक्रमका सहभागीहरूले दलित समुदायका मुद्दाहरूलाई प्राथमिकताका साथ सम्बोधन गर्दै भविष्यमा थप सक्रियता देखाउने प्रतिबद्धता जनाएका छन् । कार्यक्रमका दौरान जेष्ठ नागरिकहरूको पनि सम्मान गरिएको थियो, जसमा स्थानिय जेष्ठ नागरिकहरूलाई माला र दोसल्ला ओढाई सम्मान गरिएको थियो । जेष्ठ नागरिकहरूप्रति कृतज्ञता प्रकट गर्दै कार्यक्रमले सामाजिक एकता र परम्परागत मूल्यको जगेर्ना गर्ने प्रयास गरेको थियो।
कार्यक्रमले दलित समुदायको एकता र समृद्धिको सन्देश दिँदै आगामी दिनहरूमा थप यस्ता कार्यक्रम गर्ने योजना रहेको आयोजक समितिले जनाएको छ । कार्यक्रममा स्थानीय समाजसेवी, पत्रकार, बुद्धिजीवी तथा विभिन्न संघ संस्थाका प्रतिनिधिहरूको उपस्थिति रहेको थियो। कार्यक्रमको अन्त्यमा उपस्थित सबैले एकअर्कालाई पर्वको शुभकामना साटासाट गरे।
