पवन कुमार उपाध्याय
कार्तिक २७, रौतहट
गरुडा नगरपालिका वार्ड नं ९, विर्ता बजारमा लागू औषध दुर्व्यसन बिरुद्ध जनचेतनामूलक कार्यक्रम भव्य रूपमा सम्पन्न भएको छ । सामाजिक अभियन्ता शैलेन्द्र यादवको नेतृत्वमा भएको यस जनचेतना अभियानको प्रमुख उद्देश्य समुदायमा लागू औषधको दुष्प्रभाव, यसले पार्ने दीर्घकालीन असर, र यस समस्याको न्यूनीकरणका लागि जनचेतना अभिवृद्धि गर्नु रहेको थियो । कार्यक्रममा प्रहरी, विभिन्न संस्थाका प्रतिनिधिहरू, समाजका अगुवा, युवाहरू, महिला, बालबालिकालगायत विभिन्न क्षेत्रका व्यक्तिहरूको उल्लेखनीय सहभागिता रहेको थियो ।
कार्यक्रमको प्रमुख आकर्षणको रूपमा लागू औषध सम्बन्धी सन्देश प्रवाह गर्न सडक नाटक प्रस्तुत गरिएको थियो । नाटकले लागू औषधको प्रभावबाट एक व्यक्तिले कसरी आफ्नो जीवन बर्बाद गर्छ, परिवार र समाजमा यसको नकारात्मक असर के हुन्छ भन्ने कुरालाई भावनात्मक ढंगले प्रस्तुत गर्यो । सडक नाटक मार्फत विशेषगरी युवाहरूलाई लागू औषधको घातक असर र यसले समाजमा ल्याउन सक्ने विकृतिहरूको बारेमा सचेत गराईएको थियो। कार्यक्रममा सहभागीहरूले उक्त नाटकबाट धेरै कुरा सिकेका अनुभव सुनाए ।
सामाजिक अभियन्ता शैलेन्द्र यादवले कार्यक्रममा सहभागी सबैलाई सम्बोधन गर्दै भने, “लागू औषधको समस्यालाई रोक्न हामी सबैको सक्रिय सहभागिता अपरिहार्य छ । यो केवल व्यक्तिगत समस्या होइन, सम्पूर्ण समाजलाई असर पुर्याउने गम्भीर मुद्दा हो । हामी सबैले हातेमालो गरेर यो चुनौतीको सामना गर्नुपर्छ।“ उनले लागू औषध बिरोधी अभियानलाई निरन्तरता दिनुपर्ने आवश्यकता औंल्याए र यस प्रकारका कार्यक्रमहरू मार्फत समाजलाई सचेत गराउन सकेमा सकारात्मक परिवर्तन सम्भव हुने बताए ।
कार्यक्रममा सहभागी गरुडा ईलाका प्रहरी कार्यलयका ईन्सपेक्टर ओमप्रकाश यादबले यस किसिमका जनचेतनामूलक कार्यक्रमहरूको महत्त्वबारे आफ्नो धारणा व्यक्त गर्दै आगामी दिनहरूमा अझै बढी यस प्रकारका कार्यक्रम आयोजना गर्नुपर्ने सुझाब दिए । तिनले जनचेतनाको अभावले गर्दा धेरै मानिसहरू लागू औषधको दुष्चक्रमा फस्ने गरेका कारण यस किसिमका कार्यक्रमले सचेतना बढाउन मद्दत गर्ने धारणा राखेका थिए ।
सडक नाटक र जनचेतना कार्यक्रमको प्रभावकारिताले गर्दा यस क्षेत्रमा लागू औषध बिरोधी अभियानमा नयाँ उर्जा थपिएको छ भने सहभागिताले समाजमा लागू औषधको समस्याबारे स्पष्ट सन्देश प्रवाह गर्न सफल भएको छ । कार्यक्रममा अन्य वक्ता र उपस्थित नागरिकहरूले यस किसिमका कार्यक्रमको महत्त्वलाई स्वागत गर्दै आगामी दिनमा यस प्रकारका कार्यक्रम अझ बढाउनु पर्ने धारणा व्यक्त गरेका छन् ।
