रमेश कुमार यादब
मंसिर २३, रौतहट
रौतहट जिल्लाको गरुडा नगरपालिका–४,गरुडा स्थित श्री आधारभूत अनाथालय विद्यालयमा निर्माण हुन लागेको नयाँ भवनको शिलान्यास शनिबार वैदिक विधि अनुसार पूजाआजा गरी सम्पन्न भएको छ । पुरोहितहरुद्धारा वैदिक विधिपूर्वक पूजाआजा गरी गरुडा नगरपालिकाका नगर प्रमुख कन्थमनि प्रसाद जैसवालले भवनको शिलान्यास गर्नु भएको हो । नगर प्रमुख जैसवालले पूजाआजा गरी भवनको शिलान्यास गर्दै विद्यालय र अनाथालयको प्रगतिका लागि नयाँ भवनले ठूलो योगदान पु¥याउने विश्वास व्यक्त गर्नुभयो ।
यस श्री बंशीराम जैसवाल अनाथालय मातहत रहेको विद्यालयका लागि नव निर्मित भवनको निर्माणले विद्यालयलाई मात्र नभई सम्पूर्ण अनाथ बालबालिकाहरूको शिक्षामा समेत ठुलो टेवा पु¥याउने विश्वास व्यक्त गर्नुभयो । उहाँले भन्नुभयो, “रौतहट जिल्लाको एक मात्र अनाथालय रहेको यस विद्यालयलाई करिब एक दशकदेखि म व्यक्तिगत रूपमा सहयोग गर्दै आएको छु र आगामी दिनमा अझै प्रभावकारी योगदान गर्ने प्रतिबद्धता व्यक्त गर्दछु ।” नगर प्रमुख जैसवालले शिक्षा क्षेत्रमा भौतिक पूर्वाधारको विकासमा नगरपालिकाले विशेष प्राथमिकता दिएको उल्लेख गर्दै गुणस्तरीय शिक्षा दिन शिक्षक, अभिभावक, र विद्यार्थी सबैले आ–आफ्नो जिम्मेवारी पूरा गर्नुपर्ने धारणा व्यक्त गर्नुभयो ।
साथै उहाँले गरुडा नगरपालिकालाई पर्यटकीय गन्तव्यको रूपमा स्थापित गर्न नगरपालिकाले योजना बनाएको र त्यसलाई कार्यान्वयनमा ल्याउन प्रयासरत रहेको पनि बताउनुभयो । ४ वटा कोठा र आधुनिक शौचालय र भरयाङ्ग सहितको यो भवन निर्माणका लागि कुल लागत ५५ लाख रुपैयाँ रहनेछ । विद्यालय भवन निर्माण उपभोक्ता समितिका अध्यक्ष तथा गरुडा उधोग बाणिज्य संघको अध्यक्ष पदको प्रत्याशि सन्तोष कुमार चौधरीका अनुसार भवन निर्माण कार्य चाँडै नै सम्पन्न गर्ने लक्ष्य राखिएको छ ।
भवन निर्माणपछि विद्यालय र अनाथालयले थप व्यवस्थित रूपमा शैक्षिक तथा अन्य सेवा दिनसक्ने अपेक्षा गरिएको छ । श्री बंशीराम जैसवाल अनाथालय मातहत सञ्चालन हुँदै आएको यस विद्यालयले लामो समयदेखि आर्थिक रूपमा कमजोर तथा अनाथ बालबालिकाहरूलाई निःशुल्क शिक्षा र आश्रय प्रदान गर्दै आएको छ ।
विद्यालयको पूर्वाधार अभावका कारण समस्या झेल्दै आएको संस्थाले नयाँ भवन निर्माणपछि बालबालिकाको शिक्षामा थप गुणस्तर वृद्धि हुने विश्वास व्यक्त गरेको छ । यो शिलान्यास कार्यक्रमले स्थानीय समुदाय र नगरपालिकाको सहकार्यमा शिक्षामा गरिएको लगानी र प्रतिबद्धताको प्रतिबिम्ब देखाएको छ । यो शिलान्याससँगै विद्यालय र अनाथालय दुवैका लागि भौतिक पूर्वाधारमा थप सुविधा हुने आशा गरिएको छ ।
कार्यक्रममा स्थानीय बासिन्दा, विद्यालयका शिक्षक, अभिभावक, विद्यार्थी तथा विभिन्न संघसंस्थाका प्रतिनिधिहरूको उपस्थिति रहेको थियो । यो भवनले अनाथ बालबालिकाका लागि मात्र नभई गरुडा नगरपालिकाको समग्र शिक्षाको स्तर उकास्न महत्त्वपूर्ण भूमिका खेल्ने विश्वास गरिएको छ।
