शिक्षकद्वारा छात्रालाई अपमानजनक सन्देश, विद्यालयमा तनाब

वर्तमानकाल सम्वाददाता

रौतहट,२९ असार। रौतहटको गरुडा नगरपालिका-९ श्रीपुर माध्यमिक विद्यालयमा कार्यरत एक शिक्षकलाई आफ्नै विद्यालयकी छात्रामाथि अभद्र व्यवहार गरेको आरोपमा प्रहरीले पक्राउ गरेको छ।

सामाजिक विषय अध्यापन गर्ने ४९ वर्षीय शिक्षक रवीन्द्र प्रसाद साहले कक्षा १० मा अध्ययनरत १६ वर्षीया छात्रालाई मोबाइल सन्देशमार्फत ‘ह्याप्पी बर्थडे मेरी जान’ जस्ता अभद्र शब्द पठाएको आरोपमा प्रहरीले उनलाई नियन्त्रणमा लिएको हो।
पक्राउलगत्तै विद्यालयमा तनावको स्थिति सिर्जना भएको थियो।

शिक्षक रविन्द्र प्रसाद साहले एक छात्रालाई ‘ह्याप्पी बर्थडे मेरी जान’ जस्ता अभद्र शब्द पठाएको आरोप लगाउँदै अभिभावक र विद्यार्थीको समूहले उनलाई कुटपिट गरेका थिए।

विद्यार्थीहरू आक्रोशित भई विद्यालय परिसरमै विरोध प्रदर्शनमा उत्रिएपछि अवस्था नियन्त्रणबाहिर जान थालेको थियो। साहलाई प्रहरीले नियन्त्रणमा लिई लैजाने क्रममा विद्यार्थीहरूले ढुंगामुढा गर्न थालेपछि प्रहरीले स्थिति नियन्त्रणमा लिन अश्रुग्यास प्रहार गरेको इलाका प्रहरी कार्यालय गरुडाले जनाएको छ।

घटनामा चारजना प्रहरी सामान्य घाइते भएका छन्।

इलाका प्रहरी कार्यालय गरुडाका प्रहरी नायब उपरीक्षक राजन कार्कीले प्रारम्भिक अनुसन्धानका आधारमा साहलाई पक्राउ गरिएको जानकारी दिए। विद्यालयका प्रधानाध्यापक रामआधार पासवानका अनुसार साहले कक्षा ७ मा अंग्रेजी र कक्षा ९ मा सामाजिक विषय पढाउँदै आएका थिए।

घटनापछि विद्यालयमा अध्यापन कार्य प्रभावित भएको छ भने स्थानीय अभिभावक तथा नागरिकहरूले दोषीलाई कडा कारबाहीको माग गरेका छन्। घटनाको थप अनुसन्धान जारी रहेको इलाका प्रहरी गरुडाले जनाएको छ।