रौतहटमा एक महिलामाथि बलात्कार गरेको आरोपमा फरार भएका व्यक्ति पक्राउ

रौतहट क्षेत्र नं. २ स्थित राजपुर नगरपालिका ३ बलुवा गाउँका ७५ वर्षीय खुर्सैद खाँलाई जबरजस्ती करणीको आरोपमा प्रहरीले पक्राउ गरेको छ ।

गत वर्ष २०८१ जेठ २७ गते आफ्नै गाउँकी एक दलित महिलामाथि बलात्कार गरेको आरोपमा फरार रहेका खाँलाई जिल्ला प्रहरी कार्यालय गौरको टोलीले विभिन्न स्रोतबाट सूचनाको अनुसन्धान गर्दै हालै पक्राउ गरेको हो ।

दलित समुदायमाथि हुने यस्ता आपराधिक घटनाहरूले सामाजिक न्याय र मानव अधिकारप्रति गम्भीर प्रश्न खडा गरेका छन् । अझ गरिब, असहाय र समाजको पछिल्लो पङ्क्तिमा रहेका दलित महिलामाथि हुने यौनजन्य हिंसाले राज्य संयन्त्रको संवेदनशीलता र तत्परताको परीक्षा लिँदै आएको हो ।

जिल्ला प्रहरी कार्यालय गौरका प्रहरी निरीक्षक रामकुमार महतोका अनुसार फरार अभियुक्तको खोजीका क्रममा व्यापक अनुसन्धान गरिँदै आएको थियो । विभिन्न स्रोत र सूचनाको आधारमा टोली परिचालन गरेर अभियुक्तलाई पक्राउ गर्न सफल भयौँ महतोले बताए ।

यस घटनामा प्रहरीले देखाएको सक्रियता र अनुसन्धानप्रतिको प्रतिबद्धता प्रशंसनीय छ । समाजमा कानुनको शासन स्थापित गर्न र पीडितको न्याय सुनिश्चित गर्न यस्ता कदमहरूले महत्त्वपूर्ण योगदान पुर्‍याउने छन् ।

पीडित महिलालाई न्याय दिलाउने कार्यमा प्रहरीको अगुवाइले अन्य पीडितहरूलाई पनि हिम्मत दिने अपेक्षा गरिएको छ । साथै, समाजमा यस्ता घटनाप्रति सचेतना र सहिष्णुता अभिवृद्धि गर्नसाथै जातीय विभेद र लैङ्गिक हिंसाविरुद्धको अभियानमा सबै पक्ष एकजुट हुन आवश्यक रहेको देखिन्छ ।