रौतहट, ७ श्रावन। रौतहटको चन्द्रपुर नगरपालिका–४, टेकान टोलमा एक पुरुषको शव बेवारिसे अवस्थामा फेला परेको छ।
आज बिहान करिब साढे ६ बजे, स्थानिय बासिन्दाले अन्दाजी ४० वर्ष उमेरका पुरुष मृत फेला परेको सूचना प्रहरीलाई दिएपछि इलाका प्रहरी कार्यालय चन्द्रनिगाहपुरबाट टोली घटनास्थलमा खटिएको थियो।
जिल्ला प्रहरी कार्यालय रौतहटका प्रवक्ता डीएसपी दीपक कुमार रायका अनुसार मृतकको नाम, थर र वतन हालसम्म खुल्न सकेको छैन। शवसहितको क्षेत्रबाट कुनै पनि पहिचान खुल्ने कागजात फेला नपरेको प्रहरीले जनाएको छ। केही दिनअघि मृत्यु भएको अनुमान
प्रहरीले प्रारम्भिक रूपमा शवको अवस्था हेर्दा केही दिनअघि मृत्यु भएको हुन सक्ने आशंका व्यक्त गरेको छ। घटनास्थल सुरक्षित गरी आवश्यक मेडिकल पोस्टमार्टम तथा पहिचान खुलाउने प्रक्रिया अघि बढाइएको छ।
प्रहरीका अनुसार घटनाबारे विस्तृत अनुसन्धान जारी छ। स्थानीय बासिन्दा वा चिनेजस्तो देखिने व्यक्तिका आफन्तले तत्काल सम्पर्क गर्न प्रहरीको आग्रह छ।
