रवीन्द्र बने ‘म्याट्रिक्स फाइट नाइट’ च्याम्पियन

काठमाडौँ,१८ श्रावण। नेपाली मिक्स्ड मार्शल आर्ट्स (एमएमए) फाइटर रविन्द्र ढाँटले भारतको नोएडामा सम्पन्न म्याट्रिक्स फाइट नाइट (एमएफएन) इभेन्टमा ऐतिहासिक जित हासिल गरेका छन् ।

उनले साविक विजेता भारतीय चोङ्गरेङ्ग कोरेनलाई तेस्रो राउन्डमै नकआउट गर्दै सनसनीपूर्ण जित निकालेका हुन् । उनले तेस्रो राउन्डको ५४औँ सेकेन्डमै भारतीयलाई नकआउट गरिदिए । उनले प्रतियोगिता जित्दै एमएफएनको बान्टमवेट श्रेणीको बेल्ट पनि हात पारे ।

योसँगै ढाँटले आफ्नो व्यावसायिक करियरमा नवौँ जित दर्ता गरे । यो फाइटका लागि उनले निकै कडा तयारी र मिहिनेत गरेका थिए । त्यो कुरा भारतीय फाइटरविरूद्ध ढाँटको रणनीति सुधार र नवीनताले पुष्टि गरेको छ ।

ढाँटले इभेन्टको दोस्रो राउन्डमा कोरेनलाई थोरै दबाबमा राखे । त्यसपछि तेस्रो राउन्डमा कडा र चाँडो आक्रमण गर्दै विपक्षीको बचाउलाई निस्तेज पार्दै नकआउट जित हासिल गरे । उनका प्रशिक्षक र टिमका सदस्यहरूले पनि उनको उत्कृष्ट प्रदर्शनको प्रशंसा गरेका छन् ।

उनीहरूले यो फाइटलाई नेपालका लागि गर्वको क्षण भनेका छन् । यसले अन्तर्राष्ट्रियस्तरमा नेपाली एमएमएको मान्यता बढाएको छ । यो प्रदर्शनले ढाँटलाई भविष्यमा प्रतिस्पर्धाको लागि नयाँ उत्साह र आत्मविश्वास दिलाएको छ ।

ढाँटको सफलता नेपालका लागि महत्त्वपूर्ण सावित भएको छ । नेपाली खेलकुद क्षेत्रमा नयाँ प्रतिभाहरू आइरहेका छन्, उनीहरूका लागि पनि ढाँट हौसला बनेका छन् ।