उदयपुरमा ट्रकको ठक्करबाट एक वृद्धको मृत्यु

उदयपुर, २० श्रावण। मदन भण्डारी लोकमार्ग अन्तर्गत उदयपुरको उदयपुरगढी गाउँपालिका–७ अधेरी जोगिटोलमा सोमबार दिउँसो ट्रकको ठक्करबाट वृद्धको मृत्यु भएको छ ।

काठमाडौंबाट सुनसरी जाँदै गरेको प्र. ३-०१–००२– ख ०५६१ नम्बरको ट्रक अनियन्त्रित भइ रौतामाई गाउँपालिका- ७ का ७२ वर्षीय टंकबहादुर मगरलाई ठक्कर दिँदा उनको मृत्यु भएको हो ।

गोठालो गरेर बहिनीको घर फर्किँदै गरेका उनलाई ‘कोल्ड ड्रिङ्क्स’ बोकेर आउँदै गरेको ट्रकले ठक्कर दिएको र उनको घटनास्थलमै मृत्यु भएको जिल्ला प्रहरी कार्यालय उदयपुरका डिएसपी केदारमान दोङले बताए ।

दुर्घटनामा ट्रकका सह-चालक कालिञ्चोक गाउँपालिका-४ दोलखाका ४० वर्षीय गोमे दर्जी घाइते भएको र उनको जिल्ला अस्पताल उदयपुरमा उपचार भइरहेको उनले बताए ।

ट्रक चालक बनेपा नगरपालिका-१४ काभ्रेपलाञ्चोकका ५४ वर्षीय नवराज राउत सकुशल रहेको र उनलाई प्रहरीको नियन्त्रणमा राखिएको छ ।