भारत–नेपाल सीमा हुँदै चोरीका मोटरसाइकल बेच्ने गिरोह पक्राउ, चार जना नियन्त्रणमा

काठमाडौं, ०४ जेठ। भारत–नेपाल सीमा क्षेत्रमा चोरीका मोटरसाइकलको नम्बर प्लेट परिवर्तन गरी नेपालमा बिक्री गर्ने गिरोहलाई भारतीय प्रहरीले पक्राउ गरेको छ ।

आदापुर थानाकी थानाध्यक्ष पूजा कुमारी को नेतृत्वमा प्राप्त गोप्य सूचनाका आधारमा भारत–नेपाल सीमा अन्तर्गत मटिअरवा बोर्डर नजिक सवारी जाँचका क्रममा दुई वटा सुपर स्प्लेन्डर मोटरसाइकलसहित चार जनालाई पक्राउ गरिएको हो ।

जाँचका क्रममा बीआर ०५ आर ३४७९ र बीआर ०५ आर ५१११ नम्बरका मोटरसाइकलको एचएचडी मेसिनबाट परीक्षण गर्दा दर्ता नम्बर र चेचिस नम्बरमा फरक भेटिएको प्रहरीले जनाएको छ । त्यसपछि मोटरसाइकल चालकहरू रंजन कुमार साह तेली र आनंद कुमार साह तेली लाई नियन्त्रणमा लिएर सोधपुछ गरिएको थियो ।

उनीहरूले उक्त मोटरसाइकल ह्रदेश कुमार जयसवाल सँग १४ हजार नेपाली रुपैयाँमा खरिद गरेको बयान दिएका थिए । त्यसपछि प्रहरीले छापा मारेर ह्रदेशलाई पक्राउ गरेको थियो ।

प्रहरीका अनुसार ह्रदेशले मोटरसाइकल अजय कुमार उर्फ हरिओम कुमार बाट बिक्रीका लागि ल्याइएको स्वीकार गरेका थिए । त्यसपछि अजय उर्फ हरिओमलाई पनि पक्राउ गरिएको प्रहरीले जनाएको छ ।