फिल्म निर्देशक संघको चुनावी माहोल तातेको, अध्यक्षमा ५ जनाको भिडन्त

गिरी र खकुरेलले पनि पहिलो पटक अध्यक्षका लागि आफ्नो दाबेदारी प्रस्तुत गरेका छन् । साथै दीपाश्री निरौलालगायत केही चर्चित नामहरूको पनि चर्चा भइरहेकाले आकांक्षीहरूको संख्या अझै बढ्न सक्ने सम्भावना छ ।

संस्थाकी संस्थापक सदस्यसमेत रहेकी सुचित्रा श्रेष्ठका अनुसार निर्देशक समाज हाल एक सानो घेरामा मात्र सीमित भएको जस्तो महसुस भएकाले यसलाई थप विस्तार र सुदृढीकरण गर्न आफू पुनः अध्यक्षमा उठ्न लागेको बताउँछिन् । अघिल्ला नेतृत्वले अपेक्षाकृत काम गर्न नसकेको टिप्पणी गर्दै उनी सोमबार बिहानैदेखि सहकर्मीहरूसँग गहिरो छलफलमा जुटेकी छन् ।

‘म एउटा बलियो, सक्षम र समावेशी प्यानल घोषणा गरेर निर्वाचनमा जाने योजनामा छु,’ श्रेष्ठले भनिन् । त्यस्तै, अर्का बलिया उम्मेदवार प्रधान संस्थाको नेतृत्व अब नयाँ सोचका साथ आफूले पाउनुपर्ने दाबी गर्छन् । एक पटक अध्यक्ष भइसकेकाहरूलाई पुनः दोहोर्‍याउनुभन्दा नयाँ नेतृत्वलाई अवसर दिनुपर्ने उनको तर्क छ । सबै निर्देशकहरूलाई गोलबद्ध गरी उनीहरूको हकहितका लागि दृढतापूर्वक लड्न सक्ने सक्षम व्यक्ति आफू नै भएको दाबी प्रधानको छ ।

उता, वर्तमान अध्यक्ष पराजुलीले आफ्नो कार्यकालमा थुप्रै रचनात्मक कामहरू सुरु गरेको र केही महत्त्वपूर्ण कार्यहरू अधुरै रहेकाले ती पूरा गर्न  आफूलाई पुनः एकपटक अवसर दिनुपर्ने जिकिर गरिरहेका छन् ।
अध्यक्षका उम्मेदवार प्रधानले आफ्नो प्यानलको घोषणासहित आक्रामक लबिङ सुरु गरेका छन् । उनको प्यानलमा महासचिवमा समुद्र भट्ट, वरिष्ठ उपाध्यक्षमा सुभाष गजुरेल, उपाध्यक्षमा दीपक वली, सचिवमा राजबहादुर साने, कोषाध्यक्षमा उत्सव केसी र सह–कोषाध्यक्षमा भिम तामाङ रहेका छन् । सदस्य पदमा लक्ष्मण सुनार, यम शेर्पा र सागर केरुङ देखिएका छन् ।

अन्य अध्यक्षका उम्मेदवारहरू पराजुली, गिरी र खकुरेलले भने हालसम्म प्यानल घोषणा गरेका छैनन्, उनीहरूले व्यक्तिगत रूपमा सामाजिक सञ्जालमार्फत आफ्नो उम्मेदवारी मात्र सार्वजनिक गरेका छन् । अन्य पदका लागि स्वतन्त्र रूपमा उम्मेदवारी घोषणा गर्नेहरूमा लक्ष्मण सुवेदी (सदस्य), अमर वली (सचिव), कमलएक्सन मगर र जनक खड्का (महासचिव) र ऋषिराज आचार्य (उपाध्यक्ष) रहेका छन् । वर्तमान सचिव देवेन्द्र पाण्डेले भने यसपटक महासचिव पदमा उम्मेदवारी दिने चर्चा चलिरहेको छ ।

के छ महाधिवेशन तयारी ?

मंगलबार हुने महाधिवेशनलाई भव्य र व्यवस्थित बनाउन समाजले सम्पूर्ण तयारी पुरा गरिसकेको छ । अतिथि निमन्त्रणादेखि लिएर प्रचार सामग्रीको डिजाइन र छपाईका कामहरू सम्पन्न भएका छन् । महाधिवेशन सम्पन्न गर्नका लागि समाजले चलचित्र निर्माता, वितरक तथा हल व्यवसायी प्रदीप कुमार उदयलाई प्रमुख निर्वाचन अधिकृत तोक्दै तीन सदस्यीय निर्वाचन समिति गठन गरेको छ ।

समितिमा गीतकार तथा पत्रकार शान्ति प्रिय र ताराकुमार श्रेष्ठ निर्वाचन अधिकृतका रूपमा रहेका छन् । यस निर्वाचनका लागि २५८ जना निर्देशक र २५ जना सहायक निर्देशक गरी कुल २८३ जना अन्तिम मतदाताहरूको नामावली निर्वाचन समितिलाई बुझाइसकिएको छ । महाधिवेशन काठमाडौँको धुम्बाराहीस्थित ‘स्मार्ट दरबार’ पार्टी प्यालेसमा आयोजना हुने जानकारी समाजका सचिव देबेन्द्र पाण्डेले दिए ।

मंगलबार हुने यस निर्वाचनले निर्देशक समाजलाई कस्तो नेतृत्व प्रदान गर्ने हो भन्ने कुरामा यतिबेला सम्पूर्ण चलचित्रकर्मीहरूको ध्यान केन्द्रित भएको छ ।