कोरिया जान नपाएका ईपीएस उत्तीर्ण युवाहरू माइतीघरमा आन्दोलनमा

काठमाडौ, ११ जेठ। दक्षिण कोरिया रोजगारीको सपना बोकेर भाषा तथा सीप परीक्षा उत्तीर्ण गरेका नेपाली युवाहरू प्रशासनिक ढिलासुस्तीविरुद्ध सडकमा उत्रिएका छन् । रोजगार अनुमति प्रणाली (ईपीएस) अन्तर्गत सम्पूर्ण प्रक्रिया पूरा गर्दा पनि महिनौँसम्म कोरिया जान नपाएको भन्दै युवाहरूले सोमबार माइतीघर मण्डलामा प्रदर्शन गरेका हुन् ।

प्रदर्शनकारीहरूले “पास गरेकोलाई कोरिया पठाऊ” र “रोजगारको अधिकार सुनिश्चित गर” जस्ता नाराबाजी गर्दै सरकारको सुस्त कार्यशैलीप्रति आक्रोश व्यक्त गरेका थिए । वर्षौँको मेहनत, समय र लाखौँ रुपैयाँ खर्च गरेर भाषा परीक्षा उत्तीर्ण गरे पनि राज्यको कमजोर कूटनीतिक पहलका कारण आफूहरू अलपत्र परेको उनीहरूको गुनासो छ ।

प्रदर्शनमा सहभागी युवाहरूका अनुसार भाषा परीक्षा पास गरी रोस्टरमा नाम सूचीकृत भए पनि कोरियाली रोजगारदाताबाट श्रम सम्झौता (लेबर कन्ट्र्याक्ट) नआउँदा हजारौँ युवाको भविष्य अन्योलमा परेको छ । नेपाल र दक्षिण कोरिया सरकारबीचको कमजोर समन्वय, सीमित श्रम कोटा तथा प्रशासनिक जटिलताले श्रम आपूर्ति प्रक्रिया प्रभावित बनेको उनीहरूको आरोप छ ।

आन्दोलनमा सहभागी युवाहरूले भाषा प्रशिक्षण, सीप तालिम, मेडिकल लगायतका प्रक्रियामा ठूलो रकम खर्च भइसकेको र धेरैजना ऋणको भारमा परेको बताएका छन् । साथै उमेर सीमा नाघ्ने चिन्ताले थप मानसिक दबाब सिर्जना गरेको उनीहरूको भनाइ छ ।

“हामीले भीख मागेका होइनौँ, आफ्नै क्षमताले परीक्षा पास गरेर रोजगारीका लागि जान खोजेका हौँ,” एक प्रदर्शनकारीले भने, “सरकारले बाटो खोल्न नसक्नु दुःखद कुरा हो ।”