अमरसिंह चौर र फिर्के खोलापछि पृथ्वी चोकमा पनि घरटहरा हटाउने अभियान सुरु

काठमाडौ, १४ जेठ। पृथ्वीचोकस्थित पोखरा बसपार्क अगाडिको ‘संस्थान क्षेत्र’मा सरकारी जग्गा कब्जा गरेर बनाइएका संरचना उपत्यका नगर विकास समितिले बिहीबारदेखि हटाउन थालेको छ ।

राजनीतिक दलनिकट ट्रेड युनियन, सहारा क्लब, हिमाली सांस्कृतिक परिवार, सामुदायिक प्रहरी सेवा लगायतले प्रयोग गर्दै आएका संरचना भत्काउने प्रक्रिया सुरु भएको हो ।

पोखरा महानगरपालिकाका मेयर धनराज आचार्यले सर्वपक्षीय, सर्वदलीय सहमतिमै जेठ ५ गते अमरसिंह मावि मातहत रहेको चौरमा बनाइएका ५१ वटा संरचनामा डोजर लगाएको थियो । वर्षौंदेखि राजनीति र विवादको केन्द्रमा रहँदै आएको फिर्केखोलामा पनि सहमतिमै जेठ १० गतेबाट डोजर लगाइरहेको छ । फिर्केमा बिहीबारसम्म पनि खोला घरभित्र निर्माण भएका १ सय ६० वटा स्थायी र अस्थायी संरचना हटाउने अभियान जारी छ ।

अमरसिंह र फिर्के खोलापछि पृथ्वीचोकमा विभिन्न राजनीतिक दलनिकट संगठन, संस्थाले खडा गरेका संरचना मेयर आचार्यको नेतृत्वमा सहमतिमै खाली गराउन लागिएको हो ।

यहाँका संरचना सहमतिमा हटाउनका लागि पटक–पटक छलफल तथा सर्वपक्षीय/सर्वदलीय बैठक बसेको थियो । बिना विरोध, प्रदर्शनबिनै सहमतिमा ल्याएर संरचना हटाउने काममा काममा मेयर आचार्य अगाडि देखिएका छन् ।

मेयर धनराज आचार्यको अध्यक्षतामा रहेको उपत्यका नगर विकास समितिले पृथ्वीचोकमा बसेका दलनिकट मजदुर संगठन र संस्थालाई  ३५ दिने सूचना जारी गर्दै संरचना आफैं हटाउन आग्रह गरेको थियो । समितिले दिएको म्याद जेठ ९ गते सकिएपछि महानगर र नगर विकास समिति संयुक्त रूपमा संरचना हटाउने प्रक्रियामा अघि बढेका हुन् ।

मेयर आचार्य अब बसपार्क क्षेत्रका संरचना पनि खाली गराउने तयारी गरेका छन् । त्यसका लागि छानबिन समिति, त्यहाँबाट हटेका सुकुमवासी, भूमिहीनलाई व्यवस्थापन गर्न जग्गा पहिचान समिति र सुकुमवासी पहिचान समितिसमेत बनाएर योजनाबद्ध रुपमा अगाडि बढेको उनले बताए ।

माओवादी शान्ति प्रक्रियापछि केही समय वाईसीएल क्याम्पका रूपमा प्रयोग भएको बसपार्क क्षेत्रको सरकारी जग्गा पछि माओवादीनिकट मजदुर संगठनको नियन्त्रणमा पुगेको थियो । त्यहाँ अस्थायी टहरा मात्रै नभई स्थायी संरचना बनाएर सटर भाडामा लगाइएको थियो । अहिले नेकपा बनेको दलनिकट मजदुर संगठनले भने पछिल्लो समय अस्थायी संरचना हटाएर स्थायी भवनको चाबी महानगरपालिकालाई बुझाइसकेको छ ।

एमालेनिकट र कांग्रेसनिकट मजदुर संगठन तथा अन्य संघसंस्थाले पनि लामो समयसम्म संरचना खाली गरेका थिएनन् । हङकङ बजार अगाडि बनेका झण्डै एक सयभन्दा बढी सटर तथा कोठामा व्यवसाय सञ्चालन हुँदै आएकोमा अहिले अधिकांश व्यवसायीले ठाउँ छाडिसकेका छन् । सहारा क्लब, हिमाली सांस्कृतिक परिवार, सामुदायिक प्रहरी सेवासहित संस्थाले पनि कार्यालय सारिसकेका छन् ।

यो क्षेत्रको सरकारी जग्गा कसरी विभिन्न संस्था र राजनीतिक दलनिकट संगठनको प्रयोगमा पुग्यो भन्ने विषय भने वर्षौंदेखि विवादमा रहँदै आएको थियो ।

अनलाइनखबरले २०७८ माघमा प्रकाशित गरेको खोजमूलक समाचारअनुसार पोखरा बसपार्क र पृथ्वीचोक आसपासको सार्वजनिक जग्गा विभिन्न समयमा राजनीतिक पहुँच र नगर विकास समितिका निर्णयमार्फत प्रयोग गर्न दिइएको थियो । सुरुमा अस्थायी प्रयोग र सामाजिक प्रयोजनका नाममा दिइएका ठाउँमा पछि स्थायी संरचना निर्माण गरिए । कतिपय संस्थाले सटर बनाएर व्यावसायिक रूपमा भाडासमेत उठाउन थालेका थिए ।