अवैध व्यापारमा संलग्न चिनियाँ नागरिक पक्राउ, पर्यटक भिसाको दुरुपयोग

काठमाडौ, १६ जेठ। नवलपरासी (बर्दघाट सुस्ता पूर्व) मा पर्यटकीय भिसाको दुरुपयोग गरी अवैध रूपमा व्यापार गरिरहेका दुई जना चिनियाँ नागरिकलाई प्रहरीले नियन्त्रणमा लिएको छ ।

जिल्लाको देवचुली नगरपालिका वडा नं. १३ दलदलेस्थित बजारमा अनुमति बिना र बिल बिजक समेत नभएका सामग्रीहरू बिक्री वितरण गरिरहेको अवस्थामा उनीहरूलाई पक्राउ गरिएको हो ।

जिल्ला प्रहरी कार्यालय नवलपरासी (बर्दघाट सुस्तापूर्व) बाट खटिएको विशेष प्रहरी टोलीले हिजो शुक्रबार उनीहरूलाई सामानसहित फेला पारेको थियो । पक्राउ पर्नेहरूमा ५८ वर्षीय च्यान जिन्चियान र ६० वर्षीया यी लिहुआ रहेका छन् ।