बजेट विवादले फेरि रोकियो कोशी प्रदेशसभा बैठक

काठमाडौं, १६ असार। कोशी प्रदेश बजेटलाई लिएर सत्तारुढ र असन्तुष्ट सांसदहरूबिचको विवाद समाधान हुन नसक्दा प्रदेशसभा बैठक पुनः स्थगित भएको छ। आज दिउँसो १ बजेका लागि तय गरिएको प्रदेशसभाको नवौँ अधिवेशनको १६औँ बैठक स्थगित गरी आगामी असार १८ गते बिहीबारका लागि सारिएको हो। प्रदेशसभा सचिवालयका सचिव सुदर्शन खड्काद्वारा जारी सूचना अनुसार सरकारको अनुरोधमा बैठकको मिति परिवर्तन गरिएको हो।

यसअघि असार ११ गते बिहीबारका लागि निर्धारण गरिएको बैठक पनि विशेष कारण देखाउँदै स्थगित गरेर आजका लागि तय गरिएको थियो। तर बजेटमा देखिएको राजनीतिक असमझदारी कायमै रहेकाले सरकारकै आग्रहमा सभामुखले बैठक पुनः दुई दिन पछाडि धकेल्नुभएको हो।

‘मिति २०८३ साल असार ११ गते सूचना प्रकाशित गरी असार १६ गते मङ्गलबार दिनको १ः०० बजे बस्ने गरी निर्धारण भएको कोशी प्रदेश सभाको नवौँ अधिवेशनको १६औँ बैठक सरकारको अनुरोधमा उक्त समयमा बस्न नसक्ने भएकोले… सभामुखले बैठक सम्वत् २०८३ साल असार १८ गते बिहीबार दिनको १ः०० बजे बस्ने गरी निर्धारण गर्नुभएको छ,’ सचिवालयले आज जारी गरेको सूचनामा उल्लेख छ ।