हिक्मतसँग सहमति नजुटेपछि ओलीले गुण्डुमा तीन नेतालाई बोलाए

काठमाडौं, १९ साउन। नेकपा एमालेका अध्यक्ष केपी शर्मा ओलीले कोशी प्रदेशका मुख्यमन्त्री हिक्मत कार्कीसहित तीन नेतालाई काठमाडौँ बोलाएका छन् । प्रदेश इन्चार्ज समेत रहेका सचिव शेरधनमार्फत कार्कीलाई राजीनामा दिन लगाएर नयाँ मुख्यमन्त्री बनाउन गरेको प्रयास सफल हुने नदेखेपछि ओलीले मुख्यमन्त्री कार्कीलाई काठमाडौँ बोलाएका हुन् ।

अध्यक्ष ओलीले सचिव राईलाई विराटनगर पठाएर कार्कीलाई राजीनामा गराएर नयाँ मुख्यमन्त्री नियुक्तिको वातावरण बनाउन निर्देशन दिएका थिए । सोही अनुसार राईले सोमबार दिउँसो विराटनगरमा बैठक बोलाएर नयाँ मुख्यमन्त्री चयनबारे छलफल गरेका थिए । तर, उक्त छलफलमा मुख्यमन्त्री कार्कीले कसैले भन्दैमा राजीनामा नदिने अडान राखेपछि ओलीले कार्कीसहितका ३ जना नेतालाई काठमाडौँ बोलाएका हुन् ।

‘अध्यक्षले मुख्यमन्त्री कार्की, प्रदेश अध्यक्ष घनश्याम खतिवडा र प्रदेश इन्चार्ज शेरधन राईलाई काठमाडौँ बोलाउनुभएको छ’, अध्यक्ष ओली निकट एक नेताले भने, ‘उहाँहरू मंगलबार काठमाडौँ आएर अध्यक्षसँग छलफल गर्दै हुनुहुन्छ ।’