यमनमा तनाव बढ्ने संकेत, साउदी सैन्य सञ्जालमाथि आक्रमणको चेतावनी

यमनको विद्रोही हुथी समूहले सरकारी नियन्त्रणमा रहेका विभिन्न रणनीतिक क्षेत्रहरूमा सक्रिय साउदी सैन्य कमाण्ड सञ्जाललाई लक्षित गरी कडा आक्रमण गर्ने चेतावनी दिएको छ।

सामाजिक सञ्जाल ‘एक्स’ मार्फत जारी विज्ञप्तिमा हुथी सैन्य प्रवक्ता याह्या सारियाले यमनभित्र परिचालित साउदी सेनाको ‘सञ्चालन व्यवस्थापन तथा फिल्ड कमाण्ड’ सम्बन्धी महत्वपूर्ण सूचना समूहले हात पारेको दाबी गरेका छन्।

हुथी सैन्य प्रवक्ता याह्या सारियाकाअनुसार विद्रोही समूहले साउदी अरबको आन्तरिक भूभागसम्म लक्षित गुणस्तरीय सैन्य कारबाहीलाई निरन्तरता दिने रणनीति बनाएको छ।

उनले साउदी गठबन्धनको आक्रामकता अन्त्य नभएसम्म र यमनमाथिको नाकाबन्दी नहटेसम्म ‘नाकाबन्दीको बदला नाकाबन्दी’ र ‘तनावको बदला तनाव’ को नीति अनुरूप सैन्य अखडाहरूमा निरन्तर प्रहार गरिने स्पष्ट पारे।

प्रवक्ता सारियाले कुनै स्वतन्त्र प्रमाण प्रश्तुत नगरी दक्षिणी बन्दरगाह सहर एडेन, तेल समृद्ध प्रान्तहरू शबवा, मारिब, हद्रामौत तथा पूर्वी प्रान्त अल–माहरा र सोकोत्रा द्वीप समूहमा रहेका साउदी समर्थन संरचना र सैन्य बेसहरूको पहिचान भइसकेको दाबी गरेका छन्।

यद्यपि, हुथी समूहले गरेको यो दाबीको स्वतन्त्र पुष्टि हुन सकेको छैन। विद्रोही समूहले साउदी सैन्य अधिकारी, सेना तथा उनीहरूका अखडाहरूलाई निरन्तर निगरानी र निशाना बनाइराख्ने चेतावनी दिँदै ती क्षेत्रहरूबाट टाढा रहन सर्वसाधारण नागरिकलाई आग्रह गरेको छ।

हुथीको यस चेतावनी र दाबीका सम्बन्धमा साउदी अरब तथा यमनको अन्तर्राष्ट्रिय मान्यता प्राप्त सरकारले तत्काल कुनै औपचारिक प्रतिक्रिया जनाएका छैनन्।

पछिल्ला दिनहरूमा साउदी नेतृत्वको गठबन्धन समर्थित सरकारी सेना र हुथी विद्रोहीबीचको भिडन्त पुनः चर्किएको छ। एकातर्फ साउदी गठबन्धनले यमनमा हवाई आक्रमण जारी राखेको छ भने अर्कातर्फ हुथी समूहले सरकारी नियन्त्रित क्षेत्र र साउदी सीमाभित्र मिसाइल तथा ड्रोन आक्रमण तीव्र बनाएको छ।

सन् २०१४ को अन्त्यतिर हुथी विद्रोहीहरूले राजधानी साना र उत्तरी क्षेत्रका अधिकांश भाग कब्जा गरेपछि यमन चरम गृहयुद्धमा फसेको हो। त्यसपछि सन् २०१५ मा यमनी सरकारको समर्थनमा साउदी नेतृत्वको अन्तर्राष्ट्रिय सैन्य गठबन्धनले हस्तक्षेप गरेयता यस क्षेत्रमा मानवीय र सुरक्षा संकट गहिरिँदै गएको छ।