गरुडामा ब्रह्माकुमारी राजयोग उप–सेवा केन्द्रद्वारा भाईटिका कार्यक्रम सम्पन्न, १०० भन्दा बढी दाजुभाइलाई लगाइयो टीका

रमेश कुमार यादव
कार्तिक २५, रौतहट
रौतहट जिल्लाको मध्यभागमा अवस्थित गरुडा नगरपालिका–४ मा रहेको ब्रह्माकुमारी राजयोग उप–सेवा केन्द्रले तिहार तथा भाईटीकाको अवसरमा विशेष कार्यक्रम आयोजना गरी भाईटीका पर्व भव्य र हर्षोल्लासका साथ सम्पन्न गरेको छ।
भाईबहिनीबीचको प्रेम, आत्मीयता, स्नेह र आपसी सद्भावलाई थप प्रगाढ बनाउने उद्देश्यले आयोजित उक्त कार्यक्रममा गरुडा नगरपालिकाका नगर प्रमुख कन्थमनी प्रसाद जैसवालको प्रमुख उपस्थिति रहेको थियो। कार्यक्रममा स्थानीय दाजुभाइ, समाजसेवी तथा विभिन्न क्षेत्रका व्यक्तिहरूको सहभागिता रहेको थियो।

कार्यक्रममा केन्द्रकी मुख्य प्रशिक्षक ब्रह्माकुमारी हरदिप दिदीले उपस्थित दाजुभाइहरूलाई सप्तरङ्गी टीका लगाएर माला पहिराउँदै सुख, शान्ति, समृद्धि, सुस्वास्थ्य तथा दीर्घायुको कामना गर्दै आशीर्वाद प्रदान गरेकी थिइन्। केन्द्रले आयोजना गरेको यस विशेष कार्यक्रममा एक सयभन्दा बढी दाजुभाइले टीका ग्रहण गरेको संगम भाइजीले जानकारी दिएका छन्। भाईटीका कार्यक्रममा परम्परागत धार्मिक तथा सांस्कृतिक विधिलाई विशेष प्राथमिकता दिइएको थियो। टीका ग्रहण गर्न आएका दाजुभाइहरूलाई सप्तरङ्गी टीका, मखमली तथा सुपारी फूलको माला लगाउनुका साथै सेलरोटी, अनर्सा, चकलेट, काजु, किसमिस, नरिवल, छोकडा, विभिन्न प्रकारका मिठाई तथा अन्य परिकारहरू वितरण गरिएको थियो।

कार्यक्रमस्थलमा आध्यात्मिक वातावरणका साथै आपसी प्रेम, सद्भाव र खुसीयालीको माहोल देखिएको थियो। सो अवसरमा केन्द्रकी मुख्य प्रशिक्षक ब्रह्माकुमारी हरदिप दिदीले भाईटीका पर्वको धार्मिक, पौराणिक तथा आध्यात्मिक महत्वबारे उपस्थित सहभागीहरूलाई जानकारी गराएकी थिइन्। उनले भाईटीका केवल टीका लगाउने र माला पहिराउने परम्परा मात्र नभई दाजुभाइ तथा दिदीबहिनीबीचको निःस्वार्थ प्रेम, विश्वास, सुरक्षा र आत्मीयताको प्रतीक भएको बताइन्।

उनले पौराणिक कथालाई स्मरण गर्दै यमराज र उनकी बहिनी यमुनासँग जोडिएको भाईटीकाको परम्पराबारे पनि प्रकाश पारेकी थिइन्। धार्मिक मान्यताअनुसार यमुनाले आफ्ना दाजु यमराजलाई घरमा आमन्त्रण गरी पूजा, सत्कार र टीका लगाएर दीर्घायुको कामना गरेकी थिइन्। बहिनीको प्रेम र आतिथ्यबाट प्रसन्न भएका यमराजले उनलाई वरदान दिएको र त्यसैको सम्झनामा प्रत्येक वर्ष दाजुभाइलाई टीका लगाउने परम्परा सुरु भएको धार्मिक विश्वास रहेको उनले बताइन्।

कार्यक्रममा सांस्कृतिक प्रस्तुति, गीतसंगीत तथा अन्य मनोरञ्जनात्मक गतिविधिसमेत आयोजना गरिएको थियो। यस्ता कार्यक्रमले चाडपर्वको मौलिक संस्कृति र परम्पराको संरक्षण गर्नुका साथै समाजमा आपसी एकता, सद्भाव र भाइचाराको भावना विकास गर्न सहयोग पुग्ने सहभागीहरूले बताएका थिए। ब्रह्माकुमारी राजयोग उप–सेवा केन्द्रले धार्मिक तथा आध्यात्मिक गतिविधिमार्फत समाजमा सकारात्मक सोच, नैतिक मूल्य, शान्ति, प्रेम र सद्भावको सन्देश फैलाउँदै आएको छ। भाईटीकाको अवसरमा आयोजित यस कार्यक्रमले दाजुभाइ तथा दिदीबहिनीबीचको सम्बन्धलाई पारिवारिक सीमाभन्दा माथि उठाएर सामाजिक आत्मीयता र मानवीय सम्बन्धको उदाहरणसमेत प्रस्तुत गरेको छ।

समग्रमा, गरुडामा आयोजित यस विशेष भाईटीका कार्यक्रमले तिहारको धार्मिक, सांस्कृतिक तथा आध्यात्मिक महत्वलाई उजागर गर्दै समाजमा प्रेम, सद्भाव, एकता र आपसी सम्मानको सन्देश प्रवाह गरेको आयोजकले जनाएको छ।