२०औं एसियाली खेलकुद नजिकिँदै, बजेट अभावले प्रशिक्षण प्रभावित

काठमाडौं, ०२ वैशाख। जापानमा आगामी असोजमा हुने २०औं एसियाली खेलकुदको तयारीका लागि थालिएको विशेष प्रशिक्षण (मिसन–२०२६) रोकिएको छ ।

स्वर्णसहित दोहोरो अंकमा पदक जित्ने लक्ष्यसहित २०८० माघ १५ गतेबाट सुरु भएको विशेष प्रशिक्षण बजेट अभावका कारण गत माघ मसान्तबाट रोकिएको राखेपअन्तर्गत राष्ट्रिय टिम तयारीका उपनिर्देशक दीपक श्रेष्ठले जानकारी दिए ।

प्रशिक्षणका लागि अहिलेसम्म करिब ४/५ करोड खर्च भइसकेको छ । तर, प्रतियोगिता आउन पाँच महिना बाँकी हुँदा प्रशिक्षण भने रोकिएको छ ।

बजेटका लागि पटकपटक माग गरेपनि अहिलेसम्म नआएको उपनिर्देशक श्रेष्ठले बताए । बजेटका लागि तत्कालीन प्रधानमन्त्री सुशीला कार्कीलाईसमेत जानकारी गराइएको थियो । त्यतिबेला कार्कीले राखेपले सञ्चालन गरेको मिसन–२०२६ लाई निरन्तरता दिन निर्देशन दिएकी थिइन् । तर, हालसम्म बजेट आएको छैन ।