रौतहटमा १० हजार भन्दा बढी सुरक्षाकर्मी परिचालित

रौतहट, १७ फाल्गुन। आसन्न प्रतिनिधिसभा सदस्य पदको निर्वाचनका लागि रौतहटमा सम्पूर्ण तयारी पूरा भएको छ । मुख्य निर्वाचन अधिकृत तथा जिल्ला न्यायाधीश मनोज केसीले कटहरिया–स्थित नमुना माध्यमिक विद्यालयमा राखिने मतदान केन्द्र तथा मतगणना स्थलको निरीक्षणपछि उनले सो जानकारी दिएका हुन् ।

निर्वाचनका लागि १० हजार बढी सुरक्षाकर्मी तथा जनशक्ति परिचालन गरिएको प्रमुख जिल्ला अधिकारी दिनेश शागर भुसालले जानकारी दिए । निर्वाचनको समय शान्ति सुरक्षा कायम राख्न पैदल, मोटरसाइकल, सवारी साधन तथा बख्तरबन्द गाडीमार्फत गस्ती सुरु गरेको छ भने प्रतिनिधिसभा सदस्य निर्वाचन २०८२ लाई स्वतन्त्र, निष्पक्ष र शान्तिपूर्ण वातावरणमा सम्पन्न गराउने उद्देश्यले नेपाली सेनाको श्री नारायणदल गणले सुरक्षा व्यवस्था थप सुदृढ बनाएको छ । सेनाले सैनिक सवारी साधनसहित व्यापक सुरक्षा गस्ती र निगरानी बढाएको प्रजिअ भुसालले जनाए ।