ग्यास बोकेको ट्रकको ठक्करले वीरगञ्ज–पथलैया सडकमा दुई जनाको ज्यान गयो

वीरगञ्ज, ३१ भदौ। बाराको जितपुर सिमरा उपमहानगरपालिका–२३ स्थित वीरगञ्ज–पथलैया सडकखण्डमा ग्यास बोकेको ट्रकले मोटरसाइकललाई ठक्कर दिँदा दुई जनाको मृत्यु भएको छ ।

मंगलबार राति करिब साढे ८ बजे ना.३ ख ५६१० नम्बरको ग्यास बोकेको ट्रकले ना.४३ प ५१२२ नम्बरको मोटरसाइकललाई ठक्कर दिएको प्रहरीले जनाएको छ ।

दुर्घटनामा मोटरसाइकलमा सवार पर्साको वीरगञ्ज महानगरपालिका–१५ नगवाका ३५ वर्षीय रवीन्द्र उपाध्याय र बाराको करैयामाई गाउँपालिका–७ का ३० वर्षीय दिलिप चौधरी गम्भीर घाइते भएका थिए ।

दुर्घटनालगत्तै उद्धार गरी दुवै जनालाई उपचारका लागि वीरगञ्जस्थित नारायणी अस्पताल लगिएको थियो । तर, अस्पताल पुर्‍याएपछि चिकित्सकले दुवै जनालाई मृत घोषणा गरेका थिए ।

प्रहरीले दुर्घटनामा संलग्न ट्रकलाई नियन्त्रणमा लिएको छ । घटनाबारे थप अनुसन्धान भइरहेको बारा प्रहरीले जनाएको छ ।