मधेसको राष्ट्रवादी पार्टी र सद्भावना पार्टीबीच एकिकरण

नेपाल सद्भावना पार्टी र राष्ट्रवादी पार्टीबीच जनकपुरमा आज एकिकरण भएको छ ।

सद्भावनाका राष्ट्रिय अध्यक्ष रामकुमार महतो र राष्ट्रवादीका राष्ट्रिय अध्यक्ष सहजाद मियाँले एक समारोहबीच पार्टी एकताको घोषणा गरेका हुन् । पार्टी एकता भएपनि नाम नेपाल सद्भावना पार्टी नै रहनेछ ।सद्भावना पार्टीले प्रयोग गर्दै आएको झण्डा, छाप र चुनाव चिन्ह नै राख्ने सहमती बनेको दुबै अध्यक्षले जारी गरेको विज्ञप्तीमा भनिएको छ । एकजुट नभएसम्म अधिकार प्राप्त नहुने अवस्था सृजना भएकाले पार्टी एकता गरेको दुबै अध्यक्षको भनाई छ ।

सबै उत्पीडित जनताको पहिचान र अधिकारसहितको संघीयता, पिछडावर्ग लगायत सबै उत्पीडित समुदायको पहिचान र अधिकारसहितको संघीयता, समृद्धि र सुशासन समतामूलक समाजवादी स्थापित गर्न पार्टी एकता गरेको जारी विज्ञप्तीमा भनिएको छ ।

विज्ञप्तीमा भनिएको छ, ‘मधेस मुक्ति आन्दोलनको आँधीबेरी सृजना गर्न अपरिहार्य भएकाले नेपालको राजनीतिमा अग्रगामी परिवर्तनकारी शक्तिको रुपमा रहेका दुई पार्टीबीच एकिकरण गर्न सहमति गरेका छौं ।’