पर्सा
वीरगन्जबाट एक हुण्डी कारोबारी पक्राउ परेका छन् । पक्राउ पर्नेमा वीरगन्ज महानगरपालिका २ बस्ने ४३ बर्षिय महम्मद आसिफ अन्सारी छन् । उनलाई प्रहरीले आइतबार बिहान साढे १० बजे वीरगन्ज १६ बाट पक्राउ गरेको हो ।
शंकराचार्य गेटमा खटिएको प्रहरीको नियमित चेकिङ टोलीले भारतको रक्सौलबाट वीरगन्जतर्फ आउँदै गरेको ना २५ प ८७६२ नम्बरको मोटरसाइकललाई रोकी जाँच्दा त्यसमा सवार अन्सारीले लगाएको हेल्मेट भित्रबाट स्रोत नखुलेको ५ लाख रुपैयाँ बरामद भएको थियो ।
अन्सारीलाई बैंक तथा वित्तीय संस्था सम्बन्धी ऐन, २०७३ विरूद्वको कसूरमा अनुसन्धान अगाडि बढाइएको जिल्ला प्रहरी कार्यालयका प्रवक्ता डिएसपी ओमप्रकाश खनालले जानकारी दिए । तस्बिर सौजन्य : जिल्ला प्रहरी कार्यालय पर्सा
