ओम प्रकाश यादव
मंसिर ४ गते, रौतहट ।
पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले एमाले अध्यक्ष केपी शर्मा ओलीका कारण संविधान संशोधन हुन नसकेको बताउनुभएको छ ।
अध्यक्ष प्रचण्डले आफु दोश्रो पटक प्रधानमन्त्री हुँदा मधेशी जनताको अधिकार र माग सम्बोधन गर्ने गरी संविधान संशोधनको प्रस्ताव प्रतिनिधिसभामा लगेर दर्ता गरेपनि केपी ओलीले पारित हुन नदिएको आरोप लगाएका छन ।
संसदमा संविधान संशोधन प्रस्ताव दर्ता गर्दा पनि पारित हुन नदिने ओली मधेश र राष्ट्रविरोधी भएको उनले बताए ।
नेपाल कम्युनिष्ट पार्टी माओवादी केन्द्र रौतहटले शनिवार कटहरियामा आयोजना गरेको विशाल जनसभा तथा पार्टी प्रवेश कार्यक्रमलाई सम्बोधन गर्दै अध्यक्ष प्रचण्डले अपुरो संविधानलाई पुर्णता दिन दुई पटक संविधान संशोधन प्रस्ताव लैजाँदा ओलीकै कारणले सफल हुन नसकेको दाबी गरे ।
वर्तमान संविधानले मधेशी, थारु, मुस्लिम, महिला, दलित, आदिवासी तथा जनजातिलाई जति अधिकार दिनुपथ्र्यो त्यती दिन नसकेकोले यी उत्पीडनमा परेको अर्थात पुर्ण रुपमा अधिकार पाउन नसकेको समुदायको माग सम्बोधन गर्न संविधान संशोधन गर्ने गरेको प्रयास मधेश विरोधी ओलीका कारण सफल हुन नसकेको उनले बताए ।
केपी ओली र एमाले गुट मधेश र राष्ट्रविरोधी हो,’ प्रचण्डले भने, ‘मैले संशोधन प्रस्ताव दर्ता गर्दा पारित हुन नदिने खलनायक केपी ओली थिए ।
केपी ओली मधेश विरोधी, उत्पीडित जनताको विरोधी, मधेशी जनतालाई अधिकार दिने कुराको विरोधी, लोकतन्त्र, गणतन्त्र र संघीयता विरोधी समेत रहेको प्रचण्डले आरोप लगाए ।
मधेशको माग पुरा गर्न नचाहेको र संविधान संशोधन गर्न असहयोग गरेकै कारण ओलीलाई जनताले अहिले सडकमा पुरयाएको उनले बताए ।
मधेश विरोधी खलनायक ओलीलाई साथ दिएर महन्थ ठाकुर र राजेन्द्र महतो समेत मधेश विरोधी रहेको कुरा प्रमाणित भइसकेको समेत उनले बताए ।
प्रचण्डले माओवादीले पहिलेदेखि नै मधेशीहरुको पक्षमा रहेको भन्दै उनले मधेस विरोधी ओली, एमाले र महन्त–राजेन्द्रहरुको कारण अहिलेपनि संविधानमा मधेसको विषय प्रष्ट हुन् नसकेको बताए ।
उनले आफूलाई मधेसको मसिहा भन्ने राजेन्द्र महतो र महन्त ठाकुर पनि ओलीसँग लम्पसार पर्दा मधेसको विषय संविधानमा संसोधन हुन नसकेको बताए । उनले राजेन्द्र र महतो पनि मधेशको विरोधी भएको बताए ।
मधेशी जनताको अधिकारका लागि लडने बताउने ठाकुर र महतो मधेशी जनताको माग र मुद्धालाई पाखा लगाएर प्रतिगमनकारी एवं मधेशी जनताको अधिकार विरोधी ओलीको पुच्छर बनेको समेत उनले आरोप लगाए ।
मधेशी जनताको हक अधिकार, पहिचान र मुक्ति अब एक मात्र पार्टी माओवादी केन्द्रले नै दिलाउन सक्ने अध्यक्ष प्रचण्डले बताए ।
संविधान संशोधन र मधेशी जनताले पुर्ण रुपमा अधिकार नपाएसम्म माओवादी केन्द्रले अन्तिम समयसम्म लडिरहने प्रचण्डले बताए ।
प्रचण्डले माओवादीविरुद्ध मधेशमा विभिन्न किसिमका भ्रम फैलाउन खोजिएको भन्दै अब त्यो टुटेको र आउँदो निर्वाचनमा प्रदेश २ मा माओवादी पहिलो पार्टी बन्ने दाबी समेत गरे ।
आउँदो निर्वाचनमा माओवादीलाई प्रदेश २ मा १ नम्बरको पार्टी बन्न कसैले पनि रोक्न नसक्ने दावी गर्दै प्रचण्डले अहिले देखी नै आक्रमक रुपमा माओवादीमा लाग्न सबैलाई आग्रह समेत गरे ।
माओवादी अध्यक्ष प्रचण्डले बन्द अवस्थामा रहेको रौतहटको श्रीराम सुगर मिललाई सुचारु गराउन प्रयास गर्ने विश्वास दिलाएका छन । त्यस्तै लालबकैया र बागमति नदिबाट वर्षेणी हुने कटानलाई समेत नियन्त्रण गर्न आफु सक्दो प्रयास गर्ने समेत उनले बताए ।
