नयाँ दिल्ली, १३ माघ। भारतको पश्चिम बंगालको राजधानी कोलकातास्थित आनन्दपुर क्षेत्रमा सोमबार दुई ओटा गोदाममा आगलागी हुँदा कम्तीमा आठ जनाको मृत्यु भएको छ । मृतकको सङ्ख्या बढ्न सक्ने आशंका गरिएको छ । कम्तीमा २० जना कामदारका परिवारले प्रहरी चौकीमा मान्छे बेपत्ता भएको उजुरी लेखाएका छन् । कोलकाता प्रहरीका एक अधिकारीले अहिलेसम्म फेला परेका सबै आठ जनाको शव नराम्ररी जलेको र पहिचान गर्न गाह्रो भएको बताएका छन् ।
यसैबीच, घटनालाई लिएर राजनीतिक विवाद पनि तीव्र भएको छ । दमकल स्रोतले एक प्रसिद्ध मोमो कम्पनीका यी गोदामहरूमा पेय पदार्थ र सुख्खा खानाका प्याकेटहरू राखिएको बताएको छ । आइतबार साँझ ३ बजे आगलागी भएको खबर आएको थियो । लगभग एक दर्जन दमकलले आगो निभाउन प्रयास गरेको भएपनि आगो पूर्ण रूपमा नियन्त्रणमा नआएको बताइएको छ ।
बरुईपुरका प्रहरी अधीक्षक शुभेन्दु कुमारले पत्रकारहरूलाई भने, ‘यस समयमा, जनधनको क्षतिको सही तथ्याङ्क दिन असम्भव छ । घटनाको अनुसन्धान भइरहेको छ । त्यसपछि मात्र तस्वीर स्पष्ट हुनेछ ।’ दुबै गोदामहरू ठूलो क्षेत्रफलमा बनेका र आगो कसरी सुरु भयो भनेर पत्ता लगाउन अनुसन्धान भइरहेको घटनास्थलको भ्रमण गरेका अग्नि नियन्त्रक मन्त्री सुजित बसुले बताए ।
