वीरगञ्जको पावर हाउस चोकमा रात्री बस दुर्घटना, सबै यात्रु सुरक्षित

काठमाडौं, २६ वैशाख। काठमाडौँबाट वीरगञ्जका लागि छुटेको रात्री बस आज बिहान वीरगञ्जको पावर हाउस चोक मा दुर्घटनाग्रस्त भएको छ ।

सिकन्दर ट्राभल्स को बागमती प्रदेश ०१–००६ ख ९३५६ नम्बरको बस अनियन्त्रित भई सडकमै पल्टिएको प्रहरीले जनाएको छ ।

प्रहरीका अनुसार काठमाडौँबाट रात्रि सेवामा गुडेको उक्त बस गन्तव्यमा पुग्नै लाग्दा पावर हाउस चोक नजिक दुर्घटनामा परेको हो । दुर्घटनाको समयमा बसमा कति यात्रु सवार थिए भन्ने यकिन विवरण खुल्न नसके पनि बसमा रहेका सबै यात्रु तथा चालक दलका सदस्यहरू सुरक्षित रहेको वडा प्रहरी कार्यालय श्रीपुर ले जनाएको छ ।.

बस अचानक पल्टिँदा यात्रुहरू केहीबेर त्रसित बनेका थिए । दुर्घटनालगत्तै स्थानीयवासी तथा सुरक्षाकर्मीको टोली उद्धारका लागि घटनास्थलमा पुगेको थियो ।

प्रहरीका अनुसार केही यात्रुलाई सामान्य चोटपटक लागे पनि कसैलाई अस्पताल भर्ना गर्नुपर्ने अवस्था नरहेको छ ।