लक्ष्मीपूजालाई लक्षित गर्दै गरुडा बजारमा किनमेल गर्नेको भीडभाड

रौतहट,२१ कात्तिक। हिन्दु धर्मावलम्बीहरूको दोस्रो ठूलो महान् पर्व तिहारअन्तर्गत पर्ने लक्ष्मीपूजाको तयारी तीव्र भएसँगै रौतहटको गरुडा बजारमा किनमेल गर्ने उपभोक्ताहरूको घुइँचो लागेको छ।

पूजाका सामग्री तथा तिहारका लागि आवश्यक विभिन्न सामान खरिद गर्न बिहानैदेखि बजारमा उपभोक्ताको चहलपहल उल्लेख्य रूपमा बढेको हो। तिहारको रौनकसँगै गरुडा बजारका मुख्य सडक, पसल तथा व्यापारिक क्षेत्रमा यतिबेला विशेष चहलपहल रहेको स्थानीय संजय कुमार साहले बताए ।

लक्ष्मीपूजाका लागि आवश्यक फूलमाला, दियो, माटोका पाला, धूप, अगरबत्ती, कलश, मिठाई, फलफूल, झिलिमिली बत्ती तथा घर सजावटका विभिन्न सामग्री खरिद गर्न स्थानीयसँगै आसपासका क्षेत्रबाट समेत ठूलो संख्यामा उपभोक्ता गरुडा बजार पुगेका छन्।

बजारका विभिन्न पसलमा ग्राहकको भीड बढेको छ भने व्यापारीहरूलाई सामान बिक्री गर्न भ्याइनभ्याइ भएको देखिन्छ। विशेषगरी फूल, मिठाई, फलफूल, पूजा सामग्री, विद्युतीय बत्ती तथा सजावटका सामान बिक्री गर्ने पसलमा उपभोक्ताको आकर्षण बढी देखिएको विजय जैसवालले बताए ।

गरुडा नगर उद्योग वाणिज्य संघका अध्यक्ष सतीश साहले गरुडा व्यापारी नगरीका रूपमा परिचित हुनुका साथै आसपासका विभिन्न क्षेत्रका व्यक्तिहरूको प्रमुख किनमेल केन्द्रसमेत रहेको बताए। उनका अनुसार चाडपर्वका अवसरमा विभिन्न गाउँ तथा बजार क्षेत्रबाट उपभोक्ता किनमेलका लागि गरुडा आउने भएकाले बजारमा विशेष चहलपहल हुने गरेको छ।

“गरुडा बजार चारैतिरका व्यक्तिका लागि प्रमुख व्यापारिक केन्द्र हो,” अध्यक्ष साहले भने तिहारजस्ता ठूला चाडपर्वमा दैनिक उपभोग्य सामग्रीदेखि पूजा सामग्री र सजावटका सामानसम्म खरिद गर्न उपभोक्ताको संख्या बढ्ने गरेको छ।

यसले स्थानीय व्यापार व्यवसायलाई समेत चलायमान बनाएको छ।” लक्ष्मीपूजाको धार्मिक तथा सांस्कृतिक महत्व तिहार पर्वको विशेष दिनका रूपमा मनाइने लक्ष्मीपूजा हिन्दु धर्मावलम्बीहरूका लागि अत्यन्त महत्वपूर्ण पर्व मानिन्छ।

यस दिन धन, सम्पत्ति, सुख, समृद्धि तथा ऐश्वर्यकी देवीका रूपमा पूजा गरिने माता लक्ष्मीको विशेष आराधना गर्ने परम्परा रहेको छ। धार्मिक विश्वासअनुसार सफा, सुन्दर र उज्यालो घरमा माता लक्ष्मीको बास हुने विश्वास गरिन्छ। त्यसैले लक्ष्मीपूजाको दिन घर, पसल, कार्यालय तथा विभिन्न व्यावसायिक प्रतिष्ठानलाई विशेष रूपमा सरसफाइ गरी सजाइन्छ।

साँझपख घरका झ्यालढोका तथा आँगनमा दियो र बत्ती बालेर झिलिमिली बनाइन्छ। घरको मुख्य प्रवेशद्वारदेखि पूजा कोठासम्म लक्ष्मीलाई स्वागत गर्ने उद्देश्यले विभिन्न धार्मिक तथा सांस्कृतिक सामग्री प्रयोग गरिन्छ। कतिपय स्थानमा रंगोली बनाउने, फूलले घर सजाउने तथा घरआँगन उज्यालो पार्ने परम्परा पनि रहेको छ।

लक्ष्मीपूजाको साँझ धनधान्यकी देवी लक्ष्मीको विधिपूर्वक पूजा आराधना गरी परिवारको सुख, शान्ति, समृद्धि तथा आर्थिक उन्नतिको कामना गरिन्छ। व्यवसायीहरूले आफ्नो पसल तथा व्यापारिक प्रतिष्ठानमा पनि विशेष पूजा गर्ने गर्दछन्। व्यापार व्यवसायमा वृद्धि होस् र आर्थिक समृद्धि प्राप्त होस् भन्ने विश्वासका साथ पूजा गरिने परम्परा रहिआएको छ।

उपभोक्ताको भीडसँगै मूल्यवृद्धिको गुनासो यता, किनमेल गर्न आएका केही स्थानीय उपभोक्ताले भने चाडपर्वको मौका छोपेर केही व्यापारीले सामानमा बढी मूल्य लिने गरेको गुनासो गरेका छन्।

बजारमा एउटै प्रकारका सामानको पसलअनुसार फरक फरक मूल्य लिइने गरेको उनीहरूको भनाइ छ। किनमेल गर्न आएका एक स्थानीय उपभोक्ताले चाडपर्वका बेला अत्यावश्यक तथा पूजा सामग्रीको मूल्य बढ्ने गरेको गुनासो गर्दै बजारमा मूल्यको एकरूपता कायम गर्नुपर्ने बताए।

उपभोक्ता नठगिने वातावरण बनाउन सम्बन्धित निकायले बजार अनुगमनलाई प्रभावकारी बनाउनुपर्ने उनको माग छ। चाडपर्वका बेला उपभोक्ताको माग बढेसँगै बजारमा कृत्रिम अभाव सिर्जना गर्ने, मनपरी मूल्य असुल्ने तथा गुणस्तरहीन सामग्री बिक्री गर्ने कार्य हुन सक्ने भएकाले नियमित बजार अनुगमन आवश्यक रहेको उपभोक्ताहरूले बताएका छन्।

स्थानीय अर्थतन्त्रलाई समेत टेवा तिहार तथा लक्ष्मीपूजाको अवसरमा हुने किनमेलले स्थानीय व्यापार व्यवसायलाई समेत प्रत्यक्ष रूपमा फाइदा पुगेको छ। सामान्य दिनको तुलनामा चाडपर्वका बेला व्यापार बढ्ने भएकाले व्यापारीहरू पनि उत्साहित देखिएका छन्।

फूल व्यवसायी, मिठाई पसले, फलफूल व्यापारी, पूजा सामग्री विक्रेता, विद्युतीय सामान तथा सजावटका सामग्री बिक्री गर्ने व्यापारीको व्यापार विशेष रूपमा बढेको छ। बजारमा उपभोक्ताको आवागमन बढेसँगै यातायात, होटल तथा अन्य साना व्यवसायमा समेत सकारात्मक प्रभाव परेको स्थानीय व्यापारीहरू बताउँछन्।

तिहार नेपाली समाजको धार्मिक मात्र नभई सामाजिक, सांस्कृतिक तथा आर्थिक महत्व बोकेको पर्व हो। परिवारका सदस्यबीच भेटघाट, आपसी सद्भाव, सम्मान र खुसी साटासाट गर्ने अवसरका रूपमा समेत यो पर्वलाई लिइन्छ। लक्ष्मीपूजाको रौनकसँगै यतिबेला गरुडा बजार झिलिमिली बत्ती, पूजा सामग्री र किनमेल गर्ने उपभोक्ताको भीडले थप रौनकपूर्ण बनेको छ।

बजारमा बढेको चहलपहलले स्थानीय व्यापार व्यवसायलाई चलायमान बनाउनुका साथै तिहारको उत्साह र उमंगलाई थप बढाएको छ। तर, चाडपर्वको अवसरमा हुने सम्भावित मूल्यवृद्धि तथा उपभोक्ता ठगी नियन्त्रणका लागि सम्बन्धित निकायले प्रभावकारी बजार अनुगमन गर्नुपर्ने आवश्यकता रहेको उपभोक्ताहरूले जानकारी दिए।