प्रदेशसभा सदस्य रानी शर्मा तिवारीले दिईन संसदीय अनुगमन विशेष समिति सदस्य पदबाट राजीनामा

प्रदेशसभा सदस्य रानी शर्मा तिवारीले मधेस प्रदेशको प्रदेशसभाको संसदीय अनुगमन विशेष समितिको सदस्य पदबाट राजीनामा दिएकी छन् ।

लोकतान्त्रिक समाजवादी पार्टी नेपालको तर्फबाट प्रदेशसभा सदस्य रहेकी शर्माले समितिमा सत्तापक्षकै बहुमत रहेको र सत्तापक्षले गरेका कामहरुको अनुगमन गर्ने क्रममा सरकारले समितिलाई असहयोग गरेको भन्दै आफूले पदबाट राजीनामा दिएको बताएकी छन् ।

तिवारीले अनुगमनको क्रममा सम्बन्धित मन्त्रालयहरुले समितिलाई आवश्यक कागजातहरु समयमा उपलब्ध नगराएको आरोप लगाएकी छन् । १५ दिनका लागि बनेको यो समितिमा सत्तापक्षकै सांसदहरुको हालीमुहाली रहेको र बैठक बस्न समेत आनाकानी भइरहेकोले काम गर्न सक्ने वातावरण नै नभएको सांसद तिवारीको भनाइ छ ।

सभामुख सरोजकुमार यादवले उपसभामुख उपमाकुमारी देवको संयोजकत्वमा ८ सदस्यीय छानबिन समिति गठन गरेका थिए । समितिको सदस्यमा प्रदेशसभा सदस्य विन्देश्वरप्रसाद यादव, शिवचन्द्र चौधरी, रानी शर्मा तिवारी, अशोककुमार यादव, किशोरी साह कमल, रामकुमार यादव र सावित्री देवी साह रहेका थिए ।