रौतहट, असोज २६ I नेकपा एमाले छाडेर रौतहट क्षेत्र नम्बर २ बाट स्वतन्त्र उम्मेदवारी दर्ता गराएका प्रभु साहले केही उम्मेदवारहरुको नामावली सञ्चारकर्मीहरुलाई पठाउँदै ती आफ्नो समूहका भएको दाबी गरेका छन् । तर उनले ‘आफ्ना’ भनेका धनुषाका दुईजना प्रतिनिधि सभा सदस्यहरुले भने आफूहरु प्रभु साहको समूहमा नरहेको बताएका छन् ।
धनुषाको क्षेत्र नं. १ बाट उम्मेदवारी दिएका किशोरी साह र धनुषाको क्षेत्र नं.४ बाट स्वतन्त्र उम्मेदवारी दिएका कृष्ण कुमार महतोले आफूहरु प्रभु साहको समूहको नरहेको बताएका हुन् ।
धनुषाको क्षेत्र नं. १ बाट एमाले विद्रोह गरी स्वतन्त्र उम्मेदवारी दिएको भनिएका किशोरी साहले जनमत पार्टीबाट उम्मेदवारी दर्ता गराएका छन् । धनुषा १ (क) का प्रत्यक्ष निर्वाचित निवर्तमान प्रदेश सांसद समेत रहेका साहलाई एमालेले टिकट नदिएपछि विद्रोह गर्दै जनमत पार्टीमा प्रवेश गरेर उम्मेदवारी दिएको उनले बताए । ‘म प्रभु साहको उम्मेदवार होइन । नत म उहाँसँगै एमालेबाट विद्रोह गरेको हुँ । म एमाले छाडेर जनमत पार्टीबाट उम्मेदवार बनेको हुँ,’ उनले भने ।
यस्तै धनुषाको क्षेत्र नं.४ बाट स्वतन्त्र उम्मेदवारी दिएका यस क्षेत्रका चर्चित हाँस्य कलाकार कृष्ण कुमार महतोले पनि आफू प्रभु साह समूहमा नरहेको बताए । आफ्नो विषयमा प्रभु साहले गलत प्रचार गरेको भन्दै उनले, कुनै संगठन र व्यक्तिको उक्साहटमा नभएर स्वतन्त्र रुपमा उम्मेदवारी दिएको बताए ।
