रौतहट ३ पुस I धनुषामा बस र मोटरसाइकल ठोक्किदा एकजनाको मृत्यु भएको छ । दुर्घटनामा अर्का एकजना गम्भीर घाइते भएका छन् ।
आइतबार बिहान पूर्वपश्चिम राजमार्ग अन्तर्गत मिथिला नगरपालिका–५ ढल्केवरमा बस र मोटरसाइकल ठोक्किएर दुर्घटना हुँदा एकजनाको मृत्यु भएको हो । मृत्यु हुनेमा धनुषाको मिथिला बिहारी नगरपालिका–१ भुतहीपटेर्वाका अन्दाजी ६० वर्षीय चन्द्रदीप यादव रहेको रहेको प्रहरीले जनाएको छ ।
पूर्वतर्फ जाँदै गरेको ना ६ ख ८४२६ नम्बरको बस र विपरित दिशाबाट आउँदै गरेको ज १२ प १४९२ नम्बरको मोटरसाइकल ठोक्किदा दुर्घटना भएको ईलाका प्रहरी कार्यालय ढल्केवरका प्रहरी निरीक्षक रामसागर सिंहले जानकारी दिए ।
प्रहरीका अनुसार दुर्घटनामा गम्भीर घाइतेको परिचय खुल्न सकेको छैन । उनको जनकपुरधामस्थित काव्य हस्पिटलको सघन कक्षमा उपचार भइरहेको प्रहरी निरीक्षक सिंहले जनाए ।
मृतक यादवको शव पोस्टमार्टमका लागि प्रादेशिक अस्पताल जनकपुर पठाईएको ईलाका प्रहरी कार्यालय ढल्केवरले जनाएको छ ।
