काठमाडौँ,२७ माघ। वीरगञ्जको अवैध गोदाममा छापा मार्न गएको संयुक्त टोलीमाथि आक्रमण गर्ने चार जनालाई प्रहरीले पक्राउ गरेको छ ।
जिल्ला प्रहरी कार्यालय पर्साले सशस्त्र प्रहरीमाथि आक्रमणमा संलग्न चार जनालाई सोमबार रातिसम्म नियन्त्रणमा लिएको जनाएको हो ।
वीरगञ्ज भन्सार कार्यालय र सशस्त्र प्रहरी बलको संयुक्त टोलीले सोमबार वीरगञ्ज महानगरपालिका–आदर्शनगरस्थित अवैध गोदाममा छापा मार्ने क्रममा स्थानीय व्यापारी समूहले आक्रमण गरेका थिए ।
आक्रमणबाट तीन जना सशस्त्र प्रहरी घाइते भएका छन् भने सशस्त्र प्रहरीका दुई वटा सवारीसाधनमा समेत क्षति पुगेको छ ।
पर्सा प्रहरीका प्रवक्ता तथा प्रहरी नायब उपरीक्षक हरिबहादुर बस्नेतका अनुसार घटनामा संलग्न व्यक्तिहरूको सिसिटिभी फुटेजको आधारमा अनुसन्धान भइरहेको छ ।
उनले आक्रमणकारीको पहिचान भइसकेको र थप अनुसन्धानका कारण हाल नाम सार्वजनिक नगरिने बताए ।
प्रहरीका अनुसार संयुक्त टोलीले भन्सार छली गरेर सामान भित्र्याएको आशङ्कामा आदर्शनगरस्थित मदनप्रसाद गुप्ताको घरमा अवैध रूपमा गोदाम गरी राखिएको कपडा बरामद गर्न खोज्दा झडप भएको हो ।
सशस्त्र प्रहरीले सो स्थानबाट करिब १२ लाख ५० हजार रुपैयाँ बराबरको कपडा तथा सामग्री बरामद गरेको जनाएको छ। घटनापछि थप संलग्नहरूको खोजी तथा अनुसन्धान जारी रहेको प्रहरीले जनाएको छ।
