काठमाडौं, २९ माघ। विशेष अदालतले त्रिभुवन अन्तर्राष्ट्रिय विमानस्थलको भिजिट भिसा प्रकरणमा लाखौँ रुपैयाँ असुली काण्डका बिचौलिया खेमप्रसाद सुवेदीलाई २ लाख रुपैयाँ धरौटीमा छाड्न गर्न आदेश दिएको छ।
विशेष अदालतका न्यायाधीशत्रय नारायणप्रसाद पौडेल, हेमन्त रावल र डिल्लीरत्न श्रेष्ठको इजलासले सुवेदीलाई धरौटीमा छाड्ने आदेश दिएको हो । अदालतमा उपस्थित हुने निवेदन दिएर सुवेदी आजै उपस्थित भएका थिए ।
अध्यागमन कार्यालय, त्रिभुवन अन्तर्राष्ट्रिय विमानस्थलका तत्कालीन प्रमुख तीर्थराज भट्टराईसमेतको मिलेमतोमा भिजिट भिसाका नाममा भ्रष्टाचार र सम्पत्ति शुद्धीकरण गरेको आरोपमा अख्तियार दुरुपयोग अनुसन्धान आयोगले सुवेदी विरुद्ध मुद्दा दायर गरेको थियो ।
आयोगले गत २५ मङ्सिरमा सहसचिव तीर्थराज भट्टराईसहित ६ जनाविरुद्ध मुद्दा दायर गरेको थियो । जसमा प्रतिवादी रहेका भट्टराई यसअघि नै पाँच लाख रुपैयाँ धरौटीमा छुटिसकेका छन् । सुवेदीमाथि मुख्य कसुरदार भट्टराईले घुसबापत प्राप्त गरेको रकम लुकाउन र वैध बनाउन सम्पत्ति शुद्धीकरणमा सहयोग गरेको अभियोग छ ।
सुवेदी विरुद्ध ७९ लाख ८० हजार र सम्पत्ति शुद्धीकरणतर्फ १ करोड ३ लाख ७९ हजार ६ सय रुपैयाँ बिगो कायम गरी सजायको माग दाबी गरिएको थियो । अनुसन्धानका क्रममा सुवेदीले भक्तपुरको दधिकोटमा रहेको जग्गा तीर्थराज भट्टराईसँग जोडिएकी कविता पौडेलको नाममा पास गराइदिएर अवैध रकम लगानी गर्न सहयोग गरेको पाइएको दाबी गरिएको छ ।
