रौतहट ६ ,साउन । शुक्रबार नहरमा डुबेर बेपत्ता भएकी बालिकाको शव शनिबार फेला परेको छ।
रौतहटको चन्द्रपुर नगरपालिका-१० बडेर्वाका राजकुमार साहकी साढे ८ वर्षीया छोरी शिवानीकुमारी साह र स्थानीय परमेश्वर साहकी ८ वर्षीया नातिनी शिवानी साह गाउँनजिक रहेको नहरको छेउमा खेल्दै गरेको अवस्थामा शुक्रबार साँझ डुबेका थिए।
राजकुमारकी छोरी शिवानीलाई स्थानीय अशोक साहले नहरबाट सकुशल उद्धार गरी बाहिर निकालेका थिए। परमेश्वरकी नातिनी शिवानी भने बेपत्ता भएकी थिइन्। घटनालगत्तै इलाका प्रहरी कार्यालय चन्द्रनिगाहपुरबाट प्रहरी निरीक्षक ठाकुरप्रसाद सापकोटाको टोली खोजीमा खटिएको थियो।
राति अबेरसम्म पनि शिवानी फेला परेकी थिइनन्। प्रहरी निरीक्षक सापकोटाले हराइरहेकी शिवानीको बेपत्ता भएको स्थानभन्दा ६ किलोमिटर दक्षिण वृन्दावन नगरपालिका-६ स्थित नहरमा शनिबार बिहान मृत अवस्थामा भेटिएको बताए।
