काठमाडौं, २६ साउन । व्यापारी राकेश अडुकियाका छोरा रोहन अडुकिया त्रिभुवन अन्तराष्ट्रिय विमानस्थलबाट पक्राउ परेका छन् । नयाँ दिल्ली हुँदै इन्डियो विमानमार्फत काठमाडौं आएका उनलाई विमानस्थलबाटै पक्राउ गरिएको त्रिभुवन विमानस्थलका डीआईजी अर्जुन चन्दले जानकारी दिए । पक्राउ परेका उनलाई अध्यागमन विभागले राजश्व अनुसन्धान विभागमा बुझाइएको छ ।
अध्यागमन विभागले शुक्रबार पक्राउ गरेका भारतीय नागरिक रोहन अडुकिया १६ महिनामा ४१ पटक नेपाल आवतजावत गरेको देखिएको छ । अडुकिया शुक्रबार भारतबाट नेपाल आउँदै गर्दा उनलाई विमानस्थल अध्यगमन कार्यालयले नियन्त्रणमा लिएको हो ।
उनीमाथि साउन २ गते विमानस्थल भन्सारमा बरामद भएको एक सय किलो सुन तस्करीमा संलग्न भएको आरोप लगाइएको छ ।
पक्राउ परेका अडुकियालाई अध्यगमन विभागले राजस्व अनुसन्धान विभागमा पठाउने जानकारी दिएको छ । अध्यगमन विभागका अनुसार रोहन पछिल्लो पटक साउन ५ गते बिहान काठमाडौंबाट बाहिरिएका थिए ।
१५ चैत २०७८ देखि ५ साउन २०८० सम्मको अवधिमा उनले ४१ पटक नेपाल आउजाउ गरेको देखिएको अध्यगमन विभाग स्रोतले बतायो । रोहन पछिल्लो पटक २४ असार (जुलाई ९) मा काठमाडौं आएका थिए । त्यस दिन राति ८ बजेर ६ मिनेटमा काठमाडौं ओर्लिएका उनी त्यसपछि ५ साउनमा नेपाल छोडेका थिए ।
सन् २०२२ को एक वर्षमै रोहन २८ पटक त्रिभुवन विमास्थलमा आवागमन र प्रस्थान गरेको अध्यागमनको विवरणमा उल्लेख छ । सन् २०२३ मा भने १३ पटक आउजाउ गरेको देखिन्छ ।
उनको यात्रा विवरणमा २१ पटक काठमाडौंबाट प्रस्थान र २० पटक आवागमन गरेको देखिन्छ । पछिल्लो १६ महिनामा २१ औं पटक काठमाडौं ओर्लिंदा उनी विमानस्थल अध्यगमन कार्यालयबाट पक्राउ परेका थिए ।
रोहन नेपालमा टेस्ला ब्राण्डका विद्युतीय कार बिक्री गर्ने व्यापारी राकेश अडुकियाका छोरा हुन् । अडुकिया बाबु-छोरा काठमाडौंबाट भारत, दुबई र हङकङमा बाक्लो आवतजावत भएको देखिएको भन्दै अध्यगमन विभागले संकास्पद सूचीमा राखेको थियो । तर, उनीहरु सुन तस्करीमा संलग्न भएको वा अनुसन्धानको दायरामा परेको भन्ने पुष्टि भने राजस्व अनुसन्धान विभागले गरेको छैन ।
